Toshkent viloyatida saylov jarayoni davom etmoqda – ertalabdan aholi faolligi yaqqol ko‘zga tashlanmoqda

Shu jumladan, Toshkent viloyatida ham saylov jarayoni qizg‘in davom etmoqda.

«Ta'kidlash joizki, viloyatda Oliy Majlis Qonunchilik palatasiga saylov o‘tkazuvchi 13ta, xalq deputatlari Toshkent viloyati kengashiga saylov o‘tkazuvchi 60ta, tuman va shahar kengashlariga saylov o‘tkazuvchi 626ta okrug saylov komissiyalari bor. Shuningdek, 958ta saylov uchastkasi mavjud.

Saylovlarda ochiqlik va oshkoralik prinsiplarining to‘laqonli amalda bo‘lishida ommaviy axborot vositalarining o‘rni va ahamiyati beqiyos. Ayni paytda Xalqaro matbuot markazi Toshkent viloyati bo‘limida akkreditatsiyadan o‘tgan jurnalistlar jarayonni faol yoritib borishmoqda.

Xalqaro matbuot markazi Toshkent viloyati bo‘limi tomonidan shu paytgacha viloyat ommaviy axborot vositalari uchun 8 marta matbuot anjumani va brifing, 4 marta davra suhbati, 2 marta amaliy seminar o‘tkazildi. O‘tgan haftadan boshlab siyosiy partiya vakillari ishtirokida uchun jonli muloqot — debatlar tashkil etilmoqda. Shu paytgacha bunday muloqotlar Chirchiq, Olmaliq, Ohangaron, Angren va Yangiyo‘l shaharlaridan hamda Zangiota, Parkent, Yuqori Chirchiq, Bo‘ka, Quyi Chirchiq tumanlarida yuqori saviyada o‘tkazildi. Mazkur debatlarni yoritish uchun akkreditatsiyadan o‘tgan jurnalistlarning 10dan ortig‘i muntazam qatnashishmoqda. Bundan tashqari, «Toshkent» va «O‘zbekiston 24» telekanallari ijodiy guruhi ham ishtirok etib debatlarni informatsion dasturlar orqali yoritishda ko‘maklashdi.

«Toshkent» telekanali va radiosida, «Toshkent haqiqati» va «Tashkenskaya pravda» gazetalari, shuningdek, tarmoq nashrlari, shahar, tuman hokimliklari muassisligidagi nashrlar, O‘zbekiston milliy axborot agentligi Toshkent viloyati muxbirlik punkti, mahalliy internet saytlari hamda ijtimoiy tarmoqlarda saylovga doir materiallar muntazam yoritib borildi.

Hozirgi kunga qadar bosma nashrlarda 500ga yaqin, «Toshkent» telekanalida 20ta, internet saytlari va ijtimoiy tarmoqlarda 700dan ortiq materiallar e'lon qilindi. 

Shuningdek, jurnalistlarni akkreditatsiyadan o‘tkazish ishlari jadalik bilan olib borilmoqda. Jumladan, bugungi kungacha 52 nafar jurnalist akkreditatsiyadan o‘tkazildi. Ular orasida O‘zA va «Xalq so‘zi» muxbirlari ham bor. 

Viloyat va tuman, shaharlardagi 18ta davlat bosma nashrlarining har birida siyosiy partiyalarning targ‘ibot materiallari uchun bepul nashr maydoni ajratildi.

Xususan, «Toshkent haqiqati» va «Tashkenskaya pravda» gazetalarining beshta partiyaga tashviqot materiallari uchun teng miqdorda bepul maydon ajratildi va ular taqdim etgan materiallar chop etildi.

Saylov qonunchiligiga ko‘ra saylov kuni xizmat safari bilan yoki boshqa sabablar ko‘ra, yashab turgan joyida bo‘lmaydigan saylovchilar oldindan ovoz berish huquqiga ega. Muddatidan oldin ovoz berish saylovga 10 kun qolganda boshlanib, 3 kun qolganda yakunlanadi. Ma'lumotlarga ko‘ra, Toshkent viloyatida jami 6 ming 972 nafar saylovchi muddatidan oldin ovoz berdi.

Kezi kelganda shuni aytish kerakki, Qibraydagi 413-414-saylov uchastkalari hamda Chirchiqdagi 185-203 saylov uchastkalarida saylov jarayonlari to‘g‘ridan-to‘g‘ri translatsiya qilinadi.

Yana bir yangilik Nurafshon shahridagi 172-saylov uchastkasiga biometrik identifikatsiya qilish qurilmasi o‘rnatildi. Mazkur qurilmalar yordamida nomzodlarga ovoz berishda saylovchilar ishtirokining xolisligiga, jarayonlarning shaffof va adolatli o‘tishiga erishish maqsad qilingan.

Ovoz berish jarayonlari davom etmoqda», deyiladi Xalqaro matbuot markazi Toshkent viloyati bo‘limi xabarida.