18:33 / 06.01.2020
2
59112
UzAuto Motors компанияси IPO ўтказишни режалаштирмоқда

UzAuto Motors акцияларни дастлабки оммавий жойлаштириш (IPO) ўтказишни режалаштирмоқда, деб маълум қилди «Ўзавтосаноат» Стратегик режалаштириш бошқармаси бошлиғи Рустам Қодиров.

«Давлатнинг бизнесдан чиқадиган вақти келди. Бу ҳақда очиқ айтамиз. Агарда кимдир компания улушини сотиб олишни истаса (гап хорижлик инвесторлар тўғрисида бормоқда – таҳр.), буни қўллаб-қувватлаймиз. Бундан ташқари, UzAuto Motors IPO ўтказишни режалаштирмоқда. Бу кўпроқ Европа биржасида бўлса керак», – деди у.

Ўзбекистон президентининг 2019 йил 18 июлдаги қарорига кўра, «Ўзавтосаноат» АЖ таркибига кирувчи иккитадан кам бўлмаган акциядорлик жамиятларининг акцияларини миллий ва халқаро фонд бозорларида дастлабки оммавий жойлаштириш (IPO) йўли билан инвесторларни жалб этиш кўзда тутилган.

«Ўзавтосаноат» АЖ таркибидаги устав капиталлари улуши хорижлик инвесторларга сотиладиган корхоналар рўйхатидан UzAuto Motors, Avtooyna, Avtokomponent ва Uzavtosanoat Leasing жой олган.

Ушбу хабарга фикрингизни билдиринг. Бунинг учун авторизациядан ўтишингиз керак!
Top