Inom Majidov: «OTMga ishga olishda o‘qituvchilarga qo‘yiladigan talablar kuchaytiriladi»

Oliy o‘quv yurtiga ishga qabul qilinayotgan professor-o‘qituvchilarni tanlab olish mexanizmlari takomillashtirilib, nomzodlarga qo‘yiladigan talablar kuchaytiriladi. Bu haqda Oliy va o‘rta-maxsus ta'lim vaziri Inom Majidov ma'lum qildi.

«Talab kuchaytiriladi va ko‘proq yoshlar bilan to‘ldiriladi. Yoshlarga ilmiy ish qilish imkoniyatlari kengaytirilib, kerak bo‘lganda xorijda tajriba orttirib kelishi qamrovi oshirib boriladi», – dedi Majidov Xalqaro press-klub sessiyasida.

Uning so‘zlariga ko‘ra, OTMlar professor-o‘qituvchilarini xorijga tajriba oshirish uchun yuborish ko‘rsatkichini o‘n foizga yetkazish maqsad qilingan.

«2019 yilda 2 mingdan ortiq o‘qituvchi (ham «El-yurt umidi» jamg‘armasi, ham grantlar, ham OTMlarning o‘z hamkorlari bilan) xorijda turli shakllarda – yo o‘qigan, yo stajirovka o‘tagan yoki malaka oshirib kelgan.

Bu ko‘rsatkich ko‘payadi. Uch minggacha ko‘paytirish rejamiz bor. Professor-o‘qituvchilarimizning umumiy sonidan 10 foizga yetkazish maqsad qilingan», – dedi vazir.

Ma'lum qilinishicha, 2019 yilda xorijdan 1,5 nafardan ortiq o‘qituvchi O‘zbekiston OTMlariga kelib, turli ma'ruza va master-klasslar tashkil etgan. 2020 yilda bu ko‘rsatkich 2 mingdan kam bo‘lmasligi kutilyapti.

Eslatib o‘tamiz, 2020 yilda ta'lim sohasida amalga oshirilishi rejalashtirilgan ishlarning «yo‘l xaritasi»ga asosan, oliy ta'limdagi pedagoglar bilan bir yillik shartnoma tizimiga o‘tilishi mumkin. Hujjatda pedagog xodimlar lavozimi uchun belgilangan 5 yillik muddatni qayta ko‘rib chiqib, bir yillik mehnat shartnomalarini joriy etish haqida so‘z borgan.