Prezident qarori: Chorvachilik xo‘jaliklariga subsidiya va ekin yerlari ajratiladi

29 yanvar kuni «Chorvachilik tarmog‘ini davlat tomonidan qo‘llab-quvvatlashning qo‘shimcha chora-tadbirlari to‘g‘risida» 4576-sonli prezident qarori qabul qilindi.

Qaror bilan Chorvachilik va uning tarmoqlarini rivojlantirish Respublika kengashi tashkil etildi va uning asosiy vazifalari belgilandi.

Jumladan, kengash chorvachilik sohasida davlat va xo‘jalik boshqaruvi organlari, mahalliy davlat hokimiyati organlari, chorvachilik mahsulotlarini qayta ishlash sanoati korxonalari hamda chorvachilik faoliyati bilan shug‘ullanuvchi tadbirkorlik sub'yektlarining o‘zaro hamkorligini ta'minlaydi.

Qarorga muvofiq:

• chorvachilik, parrandachilik, baliqchilik va quyonchilik bo‘yicha loyihalarini amalga oshirish uchun tijorat banklari tomonidan ajratiladigan 20 milliard so‘mgacha miqdordagi kreditlar bo‘yicha foiz stavkasining Markaziy bankining asosiy stavkasidan oshadigan, lekin 8 foiz punktidan ko‘p bo‘lmagan qismiga kompensatsiya yoki kredit summasining 50 foizi miqdorida kafillik taqdim etiladi;
• tadbirkorlarga ekvivalenti 20 milliard so‘mdan oshmaydigan xorijiy valutadagi kreditlar uchun tijorat banklari tomonidan belgilangan foiz stavkasining 40 foizigacha, lekin 4 foiz punktidan ko‘p bo‘lmagan miqdorda tijorat banklarining kreditlari bo‘yicha foiz xarajatlarini qoplash uchun kompensatsiya taqdim etiladi.

Shuningdek, 2020-2022 yillarda davlat tomonidan quyidagi tartibda subsidiya ajratiladi:

Chorvachilik mahsulotlari yetishtiruvchi xo‘jaliklarga:

1. respublikada faoliyat yuritayotgan naslchilik xo‘jaliklaridan sotib olingan har bir bosh qoramolga 1 million so‘m miqdorida;
2. xorijiy davlatlardan import qilingan nasldor qoramolning har bir boshiga 2 million so‘m, nasldor qo‘y va echkining har bir boshiga 400 ming so‘m miqdorida;

«O‘zbekbaliqsanoat» uyushmasiga a'zo bo‘lgan intensiv usulda baliq yetishtiruvchi xo‘jaliklarga:

1. intensiv usulda yetishtirilgan bir tonna baliq mahsuloti uchun 1 million so‘m miqdorida;
2. O‘zbekiston hududiga import qilingan 1 dona nasldor ona baliqning 3,5 million so‘mgacha bo‘lgan xarajatlarining 50 foizi miqdorida;

«Parrandasanoat» uyushmasiga a'zo bo‘lgan parrandachilik xo‘jaliklariga har bir bosh 1 kunlik nasldor jo‘jani import qilish bilan bog‘liq xarajatlarning 9 ming so‘mini qoplash uchun.

Hujjatga muvofiq, Qoraqalpog‘iston Respublikasi Vazirlar Kengashi, viloyat hokimliklari:

• 2020 yilda yaylovlar hamda Prezidentning 2019 yil 17 iyundagi «Qishloq xo‘jaligida yer va suv resurslaridan samarali foydalanish chora-tadbirlari to‘g‘risida»gi farmonida nazarda tutilgan qishloq xo‘jaligida foydalanilmayotgan sug‘oriladigan yerlarni foydalanishga kiritish hisobidan ozuqabop ekinlarni yetishtirishni yo‘lga qo‘yish uchun chorvachilik xo‘jaliklariga ajratib berilishini;
• Veterinariya va chorvachilikni rivojlantirish qo‘mitasi hamda Yer resurslari, geodeziya, kartografiya va davlat kadastri qo‘mitasi bilan birgalikda paxta-to‘qimachilik klasterlari va paxtachilik-g‘allachilik yo‘nalishidagi fermer xo‘jaliklari ekin maydonining 10 foiziga beda ekilishini ta'minlaydi.

Chorvachilik va uning tarmoqlarini rivojlantirish Respublika kengashi Qoraqalpog‘iston Respublikasi Vazirlar Kengashi va viloyatlar hokimliklari tomonidan chorvachilik, shu jumladan, parrandachilik xo‘jaliklariga ozuqabop ekinlar ekish uchun chorva mollari va parranda bosh soniga mutanosib ravishda ekin yerlari ajratilishini doimiy ravishda nazorat qilib boradi.

Veterinariya va chorvachilikni rivojlantirish davlat qo‘mitasi:

• Samarqand veterinariya meditsinasi instituti huzuridagi Kadrlarni qayta tayyorlash va ularning malakasini oshirish markazi xodimlarini jalb qilgan holda joylarda sut sog‘uvchilarni tayyorlash hamda malakasini oshirish bo‘yicha qisqa muddatli o‘quv kurslarini tashkil etadi;
• Qoraqalpog‘iston Respublikasi Vazirlar Kengashi, Andijon, Jizzax, Navoiy, Surxondaryo, Qashqadaryo viloyatlari hokimliklari va «Parrandasanoat» uyushmasi bilan birgalikda parrandalarning yuqori mahsuldor zotlari va krosslarini urchitish bilan shug‘ullanuvchi go‘sht yo‘nalishidagi II tartibli reproduktor naslchilik parrandachilik korxonalari faoliyatini yo‘lga qo‘yadi.

Hujjat bilan Transport vazirligi va Uzbekistan Airways’ning 2022 yil 1 yanvarga qadar «Parrandasanoat» uyushmasi tarkibidagi parrandachilik korxonalariga o‘zi ishlab chiqargan tuxum va go‘sht mahsulotlarini eksport qilishda nasldor inkubatsion tuxum va nasldor bir kunlik jo‘jalarni, vaksina, veterinariya dori vositalarini import qilishda, istisno tariqasida, amaldagi havo transportida tashish tariflariga nisbatan 20 foizlik chegirma berish to‘g‘risidagi taklifi ma'qullangan.

Qishloq xo‘jaligi vazirligi Veterinariya va chorvachilikni rivojlantirish qo‘mitasi, Suv xo‘jaligi vazirligi, Yer resurslari, geodeziya, kartografiya va davlat kadastri qo‘mitasi bilan birgalikda bir oy muddatda ozuqa ekin maydonlaridan kelib chiqqan holda 2020-2022 yillar uchun ozuqabop ekinlar urug‘chiligini rivojlantirish dasturini ishlab chiqish va tasdiqlash uchun Vazirlar Mahkamasiga kiritish topshirilgan.