Lukashenko korrupsiyachi amaldorlar bo‘lgan samolyotni Yevropadan ortga qaytartirganini ma'lum qildi  

Yanvar oxirlarida Belarusda shakar zavodlarining direktorlari hibsga olingani haqida gaplar tarqalgan edi. Yaqin kungacha Belarus huquq-tartibot idoralarida bu vaziyatga hech qanday izoh berilmay kelgan. Mamlakat prezidenti Aleksandr Lukashenko bunga ilk bor izoh berdi.

24 yanvarda “Belavia” aviakompaniyasining Minskdan Myunxenga muntazam reysni bajarayotgan samolyoti Polsha ustida ortga qaytarilib, Belarusning chegaradagi Grodno shahrida qo‘ndirilgan.

Yo‘lovchilarning ta'kidlashicha, shundan keyin samolyotga maxsus xizmatlar kiyimida bo‘lgan odamlar kirib, bir nechta familiyani o‘qigan va salondan 6-8 kishini, jumladan 2 nafar o‘smir qizni olib chiqib ketgan. Qolgan yo‘lovchilar Myunxenga 8 soatlik kechikish bilan yetib borishgan. Samolyot sardori ushbu voqeani “nosozliklar” bilan tushuntirgan.

4 fevralda Belarus yetakchisi Aleksandr Lukashenko jurnalistlarga samolyot bortida Yevropaga qochib ketishi mumkin bo‘lgan korrupsiyachi amaldorlar bo‘lgani uchun uning buyrug‘i bilan ortga qaytarilganini ma'lum qildi.

“U yerda pogonlilar ham qo‘lga tushdi. “Barchasini kameraga tiqing” deb buyurdim. Barchasini. Samolyotni G‘arbiy Yevropadan qaytarib, qo‘ndirishni va ularni samolyotdan olib chiqishni buyurdim. Samolyotni qaytarishdi, ularni olib chiqib, tergov izolyatoriga jo‘natishdi. Ularga qattiqqo‘l munosabat bo‘ladi”, deb aytgan Lukashenko.

Avvalroq OAVda Belarusdagi barcha 4 ta shakar zavodi direktorlari hamda Belarus shakar kompaniyasining Moskvadagi rahbari hibsga olingani ma'lum qilingandi. OAV ma'lumotlariga ko‘ra, “shakar ishi” bo‘yicha hibsga olinganlar soni 10 kishidan oshishi mumkin.

Belarus rahbari ularni shakar sotishdagi firibgarliklar va boshqa tovlamachiliklarda ayblagan.

“Bir kun ichida hammasini sidirib oldik, bu mening qat'iy buyrug‘im edi. Barchasi ko‘rsatma berdi. Ularni hech kim qiynamadi, urmadi – o‘tqizib, “faqat to‘g‘risini aytasan”, dedik. Barchasi kim bilan aloqada bo‘lgani, kimlarga olib borgani, kimga berganini yozib berdi. Tintuvlar o‘tkazdik, talaygina mol-mulk topildi: o‘nlab zamonaviy mashinalar, o‘nlab kvartiralar, hashamatli uylar va juda katta miqdorda pullar”, deb ma'lum qilgan Belarus prezidenti.

Lukashenkoning ta'kidlashicha, unda hibsga olinganlardan birortasiga nisbatan shaxsiy husumat yo‘q.

“Menda hech kimga e'tiroz yo‘q. Men davlat manfaatlarini himoyalamoqdaman. Bilasizmi, yana nima g‘azablantiradi: sen u yerda neft, gaz, metall, yana nimadir bo‘yicha tiyinga kurashayotgan, bir narsa qurishga, odamlar maosh olishi uchun harakat qilayotgan bir paytda, bu palidlar kuppa-kunduz kuni o‘g‘irlamoqda. Axir bu to‘g‘rimi? Noto‘g‘ri. Shuning uchun bu barcha direktorlarga saboq bo‘lsin”, deb so‘zlarini yakunlagan Lukashenko.