Belarus prezidenti Aleksandr Lukashenko AQSH prezidentining maxsus vakili Jon Koul bilan muzokaralardan soʻng 25 nafar siyosiy mahbusni ozod qildi. Bu haqda amerikalik mulozim oʻzining X ijtimoiy tarmogʻidagi sahifasida yozdi. U Vashington Minsk bilan munosabatlarni yoʻlga qoʻyish boʻyicha ishlarni davom ettirishini taʼkidladi va kelajakda boshqa siyosiy mahbuslarni ham ozod qilishga erishishga vaʼda berdi.
Minskda Lukashenko bilan uchrashuv chogʻida Koul Belarus qamoqxonalaridan 25 nafar siyosiy mahbusni ozod qilish evaziga «Lakokraska» va «Bellesbumprom» kompaniyalaridan sanksiyalarni olib tashlashni taklif qildi. Keyinchalik, 16-sentabrda u X tarmogʻida shunday yozdi:
«Bugun 25 mahbus ozod qilindi! Prezident Trampning diplomatiyaga sodiqligi oʻz samarasini bermoqda. Rahmat, prezident Lukashenko, bu qadam uchun, va Litvadagi doʻstlarimizga qoʻllab-quvvatlagani uchun rahmat. Biz AQSH-Belarus munosabatlarini yaxshilashda davom etamiz va yaqin kelajakda koʻproq odamlarni ozod qilishni taʼminlash ustida ishlayapmiz. Biz hali tugatganimiz yoʻq!»
«Zerkalo» nashrining taʼkidlashicha, ozod etilganlar orasida tut.by nashri bosh direktori Lyudmila Chekina, «Art Syadzіby» va Symbal.by milliy ramzlar va suvenirlar doʻkoni asoschisi Pavel Belous, jurnalist va media-menejer Andrey Aleksandrov, siyosatshunos Tatyana Kuzina, «BelaPAN» axborot agentligi direktori Dmitriy Novojilov, jurnalist Kirill Poznyak va uning qizi Yanina Poznyak, noshir Dmitriy Kolos va boshqalar bor.
Koulning Lukashenko bilan muzokaralari maxsus vakilning Belarus hukumati bilan birinchi aloqasi emas edi: avvalroq u Lukashenkoni AQShga taklif qilib, Tramp unga hurmat bilan munosabatda ekanini va jahon yetakchilari orasidagi doʻstlari qatorida tilga olishini aytgan edi.
