Migratsiya agentligi direktori Muhsinxoʻja Abdurahmonov Belarusning Oʻzbekistondagi favqulodda va muxtor elchisi Aleksandr Ogorodnikov bilan uchrashdi.
Uchrashuvda Oʻzbekiston fuqarolarini Belarusga, xususan, Vitebsk viloyatiga uyushgan tartibda ishga joylashtirish masalalari koʻrib chiqildi.
Qayd etilishicha, viloyat ish beruvchilari 800 nafarga yaqin xodimga ehtiyoj bildirgan.
Ish oʻrinlari chorvachilik, traktorchilik, haydovchilik va yordamchi ishlar yoʻnalishlarida taklif etilmoqda. Nomzodlarning hujjatlari va kasbiy koʻnikmalari dastlabki bosqichda tekshiriladi, yakuniy tanlov esa Belarus ish beruvchilari bilan onlayn suhbatlar asosida oʻtkaziladi.
Tanlovga respublikaning barcha hududlaridan talabgorlar jalb etiladi.
Shuningdek, fuqarolarning yoʻl xarajatlarini ish beruvchi tomonidan oldindan qoplash imkoniyatini oʻrganish taklif etildi.
