O‘zbekiston xorijiy sheriklar bilan harbiy hamkorlikni yanada rivojlantirmoqchi

2017–2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Ilm, ma'rifat va raqamli iqtisodiyotni rivojlantirish yili”da amalga oshirishga oid davlat dasturi tasdiqlandi.

Yil davomida  tegishli amaliy chora-tadbirlar ishlab chiqiladi. Bunda:

yetakchi xorijiy davlatlarning qo‘shinlari, shuningdek, oliy harbiy ta'lim muassasalari va tadqiqot markazlari bilan birgalikda harbiy xizmatchilarni o‘qitish va malakasini oshirishni tashkil etish;

O‘zbekiston Respublikasi Qurolli Kuchlarining jangovar-xizmat faoliyatida xorijiy mamlakat qo‘shinlarining ilg‘or tajribasini chuqur o‘rganish va keng tatbiq etish;

O‘zbekiston Respublikasi Milliy gvardiyasining xorijiy davlatlarning Milliy gvardiya va boshqa tegishli idoralari bilan hamkorligini o‘rnatish, shu jumladan O‘zbekiston Respublikasi Milliy gvardiyasi va Qozog‘iston Respublikasi Ichki ishlar vazirligi o‘rtasida hamkorlik bitimini imzolash;

Pokiston hukumati va mudofaa vazirligi bilan harbiy hamkorlik va harbiy razvedka sohasida o‘zaro anglashuv memorandumlarini, Tojikiston mudofaa vazirligi bilan harbiy razvedka sohasida hamkorlikni yo‘lga qo‘yish bo‘yicha anglashuv memorandumini va Qozog‘iston mudofaa vazirligi bilan harbiy razvedka sohasida hamkorlik bitimini imzolash;

Qurolli Kuchlar Akademiyasida xalqaro konferensiyalarni o‘tkazish; 

Qurolli Kuchlar Akademiyasi professor-o‘qituvchilari tomonidan xorijiy mamlakatlarning Oliy harbiy bilim yurtlarida ma'ruzalar o‘qish; 

Markaziy Osiyo mamlakatlari harbiy xizmatchilarining Qurolli Kuchlar Akademiyasida tahsil olishini yo‘lga qo‘yish bo‘yicha chora-tadbirlarni amalga oshirish nazarda tutiladi.