Reuters agentligi 28-sentabr kuni tanishgan hukumat hujjatlariga tayanib, shunday xabar berdi.
Hujjatlarga koʻra, Rossiyaning kelgusi uch yildagi umumiy mudofaa xarajatlari 50 trillion rublni tashkil etadi. 2026-yil uchun esa mudofaa maqsadlariga 12,1 trillion rubl sarflash rejalashtirilgan edi.
Reuters amaldagi xarajatlar miqdori maxfiyligini qayd etgan. Harbiy xarajatlarning bir qismi byudjetning boshqa boʻlimlariga ham kiritilgan boʻlishi mumkin.
Byudjet taqchilligi prognozi ikki baravar oshirildi
Rossiya hukumati 2026-yil uchun byudjet taqchilligi prognozini yalpi ichki mahsulotning 1,6 foizidan 3,2 foiziga oshirgan.
Joriy yilda byudjet xarajatlari 13,2 foizga koʻpayib, 48,6 trillion rublga, yaʼni YaIMning 20,9 foiziga yetishi kutilmoqda.
Byudjet toʻgʻrisidagi qonun loyihasi 1-oktabr kuni Davlat dumasiga kiritilishi kerak.
Yangi soliqlar va qoʻshimcha qarzlar
Oʻtgan hafta, saylovlardan soʻng, Rossiya rasmiylari 2027-yilda soliqlarni yana oshirish rejalarini eʼlon qilgan.
Xususan, togʻ-kon va metallurgiya majmuasining ayrim segmentlari hamda oʻgʻit ishlab chiqaruvchilarning oʻta yuqori daromadlariga yangi soliq joriy etish orqali yiliga qariyb 200 milliard rubl qoʻshimcha tushum olish kutilmoqda.
Hujjatlarga koʻra, 2027-yilda sof qarz olish rejasi 26 foizga oshirilib, 5 trillion rublga yetkaziladi. Byudjet taqchilligini qisqartirish uchun Milliy farovonlik jamgʻarmasidan 459 milliard rubl yoʻnaltirish ham koʻzda tutilgan. Bu jamgʻarmaning likvid qismining taxminan 11 foiziga teng.
Neft va gaz daromadlari prognozi pasaytirildi
Rossiya hukumati 2026-yilda neft va gazdan olinadigan daromadlar prognozini avval kutilgan 8,9 trillion rubldan 7,6 trillion rublga tushirgan.
Davlat qarzi 2026-yildagi YaIMning 19,9 foizidan 2027-yilda 21,7 foizigacha oʻsishi kutilmoqda. Bu Rossiya rasmiylari xavfsiz deb hisoblaydigan 20 foizlik darajadan yuqori.
