Toshkentda muz sporti va savdo obektlari majmuasi quriladi

Vazirlar Mahkamasining “Toshkent shahrida muz sporti hamda zamonaviy savdo va xizmat ko‘rsatish obektlari majmuasini qurish ishlarini tashkil etish chora-tadbirlari to‘g‘risida”gi qarori loyihasi muhokama uchun joylashtirildi.

Toshkent shahar hokimligi, O‘zbekiston Respublikasi Davlat aktivlarini boshqarish agentligi hamda Jismoniy tarbiya va sport vazirligining:

a) Toshkent shahar, Shayxontohur tumani, Beruniy shohko‘chasi, 41-uy manzilida joylashgan “O‘zko‘rgazmasavdo” MChJ, “Alpomish savdo qatorlari” MChJ va “O‘zcharmsanoati” uyushmasiga operativ boshqaruv huquqi asosida tegishli bo‘lgan bino va inshootlarni O‘zbekiston Respublikasi Davlat aktivlarini boshqarish agentligiga operativ boshqaruv huquqi asosida berish;

b) “O‘zko‘rgazmasavdo” MChJning tegishli mol-mulklari va boshqa vositalari, shuningdek, debitorlik va kreditorlik qarzlari bilan birgalikda (ko‘chmas mulk obektlari bundan mustasno), “O‘zagroeksport” AJga qo‘shish hamda “O‘zagroeksport” AJ ustav kapitalidagi (ustav fondidagi) davlat ulushini Davlat aktivlarini boshqarish agentligiga operativ boshqaruv huquqi asosida o‘tkazilayotgan ko‘chmas mulk obektlarining qoldiq (balans) qiymatiga kamaytirish;

v) bino va inshootlar joylashgan hududda qishki sport turlari (figurali uchish, short-trek, kyorling va boshqa sport turlari) bo‘yicha musobaqalar o‘tkazish, ko‘rgazma hamda forumlar tashkil etishga mo‘ljallangan zamonaviy muz saroyi hamda savdo, xizmat ko‘rsatish va ta'lim muassasalari obektlari majmuasini barpo etish loyihasini amalga oshirish uchun “nol” xarid qiymatida “New Universal Development” MChJga to‘g‘ridan-to‘g‘ri sotish to‘g‘risidagi taklifiga rozilik berilishi mumkin.

Belgilab qo‘yilishicha, investor quyidagi investitsiya va ijtimoiy majburiyatlarni bajarishni o‘z zimmasiga oladi:

bino va inshootlar joylashgan yer uchastkalari olib qo‘yilishi va xususiy mulkdorlarga tegishli savdo do‘konlari buzilishi natijasida yetkaziladigan zararlarni o‘rnatilgan tartibda to‘liq qoplash;

bino va inshootlar negizida va unga tutash hududlarda qishki sport turlari (figurali uchish, short-trek, kyorling va boshqa sport turlari) bo‘yicha musobaqalar o‘tkazish, ko‘rgazma hamda forumlar tashkil etishga mo‘ljallangan zamonaviy muz saroyi hamda savdo, xizmat ko‘rsatish va ta'lim muassasalari obektlari majmuasini barpo etib, to‘liq ishga tushirish uchun kamida 100,0 mlrd. so‘m miqdorida investitsiya kiritish;

kamida 120 ta yangi ish o‘rinlarini yaratish.

O‘zbekiston Respublikasi Davlat aktivlarini boshqarish agentligi, Toshkent shahar hokimligi:

“O‘zko‘rgazmasavdo” MChJ bilan birgalikda qayd etilgan mol-mulk hamda bino va inshootlar bo‘yicha topshirish-qabul qilish ishlarini amalga oshirilishini;

bino va inshootlar belgilangan tartibda Davlat aktivlarini boshqarish agentligiga topshirilgandan so‘ng, belgilangan shartlar asosida investor bilan bino va inshootlarni “nol” xarid qiymatida sotish bo‘yicha oldi-sotdi shartnomasi tuzilishini hamda investitsiyaviy va ijtimoiy majburiyatlar bajarilishi yuzasidan monitoring olib borilishini;

“O‘zko‘rgazmasavdo” MChJni o‘rnatilgan tartibda “O‘zagroeksport” AJga qo‘shilishini hamda “O‘zagroeksport” AJning ustav kapitalidagi (ustav fondidagi) davlat ulushini Davlat aktivlarini boshqarish agentligiga o‘tkazilayotgan bino va inshootlarning qoldiq (balans) qiymatiga kamaytirishini ta'minlaydi.

Belgilanishicha:

nazarda tutilgan xususiy mulkdorlarga tegishli savdo do‘konlari buzilishi natijasida yetkaziladigan zararlarni qoplab berish Vazirlar Mahkamasining 2019 yil 16 noyabrdagi 911-son qarori bilan tasdiqlangan Yer uchastkalari olib qo‘yilishi va olib qo‘yilayotgan yer uchastkasida joylashgan ko‘chmas mulk obektlari mulkdorlariga kompensatsiya berish tartibi to‘g‘risidagi nizomga asosan investor tomonidan amalga oshiriladi;

qayta tashkil etilayotgan “O‘zko‘rgazmasavdo” MChJning ulushlarini “O‘zagroeksport” AJga qo‘shilishi munosabati bilan nominal qiymatda konvertatsiya qilinadi;

qishki sport turlari (figurali uchish, short-trek, kyorling va boshqa) bo‘yicha musobaqalar o‘tkazish, ko‘rgazmalar hamda forumlar tashkil etishga mo‘ljallangan zamonaviy muz saroyini tashkil qilish 2020 yil 1 sentyabrga qadar;

zamonaviy savdo va xizmat ko‘rsatish, ta'lim muassasalari obektlarini qurish ishlarini 2021 yil 1 iyuliga qadar yakunlanadi;

istisno tariqasida investor tomonidan qurilish ishlari bilan bir vaqtda loyiha-smeta hujjatlarini ishlab chiqishga ruxsat beriladi.