«O‘zagrokimyohimoya» tugatiladi, yangi agentlik tashkil etiladi - Prezident qarori loyihasi

qishloq xo‘jaligi o‘simliklarida kasalliklar, zararkunanda hasharotlar va begona o‘tlarning rivojlanishi va tarqalishini prognozlashtirish orqali ularning zarar yetkazish xavfini oldindan o‘rganish va o‘simliklarni himoya qilish vositalariga bo‘lgan talabni aniqlash;

qishloq xo‘jaligi uchun mo‘ljallangan yerlarda, shu jumladan tomorqa yerlarida va issiqxona xo‘jaliklarida fitosanitar holat ustidan doimiy kuzatuv va nazorat olib borish, qishloq xo‘jaligi o‘simliklarida kasalliklar, zararkunanda hasharotlar va begona o‘tlarning rivojlanishi, tarqalishi hamda ularni bartaraf etish bo‘yicha ilmiy tavsiyalarga asoslangan tadbirlar to‘g‘risida yagona onlayn maslahat tizimini yaratish;

qishloq xo‘jaligi o‘simliklarida kasalliklar va zararkunandalarga qarshi kurashish uchun zamonaviy bio va nanotexnologiyalarni keng qo‘llash, yangi turdagi biologik vositalar introduksiyasini yo‘lga qo‘yish, biolaboratoriyalar hamda o‘simliklar klinikalari tarmog‘ini kengaytirish va bu borada o‘zaro manfaatli hamkorlik asosida davlat-xususiy sheriklik tizimini rivojlantirish, sohaga xorijiy investitsiyalar va xalqaro moliya institutlari grantlarini jalb qilish;

qishloq xo‘jaligi o‘simliklarida zararkunanda hasharotlarga qarshi kurashish uchun kimyoviy vositalardan foydalanishni kamaytirish va biologik usulni rivojlantirish maqsadida respublikada mavjud biolaboratoriyalar faoliyatini kuchaytirish, ularning moddiy-texnika bazasini mustahkamlash hamda biomahsulotlar sifatini nazorat qilish;

qishloq xo‘jaligi uchun mo‘ljallangan yerlarda radiologik va toksikologik kuzatuvlar olib borish, qishloq xo‘jaligi mahsulotlari tarkibidagi pestitsid qoldiqlari miqdorini tahlil qilish, organik va ekologik toza mahsulot yetishtirish reglamentlarini belgilash;

qishloq xo‘jaligi o‘simliklarida kasalliklar, zararkunanda hasharotlar va begona o‘tlarning rivojlanishi va tarqalishini tezkor aniqlash hamda biomahsulotlarni tarqatish uchun uchuvchisiz qurilma (dron)lardan foydalanishni keng joriy etish;

qishloq xo‘jaligi o‘simliklarini himoya qilish uchun foydalaniladigan kimyoviy vositalarni va biomahsulotlarni tashish, saqlash, sotish va ularni qo‘llash bo‘yicha belgilangan qoidalarga rioya etilishi ustidan nazorat o‘rnatish;

qishloq xo‘jaligi o‘simliklarida o‘ta xavfli zararli organizmlarning yoppasiga tarqalishi natijasida yuzaga kelgan favqulodda vaziyatlarni tezkor bartaraf etish bo‘yicha chora-tadbirlarni ishlab chiqish va bu to‘g‘risida Qishloq xo‘jaligi vazirligiga takliflar kiritish;

tuproqning agrokimyoviy tahlillari asosida agrokimyoviy xaritanomalarni ishlab chiqish, tuproqning ozuqa moddalari bilan ta'minlanganlik darajasidan kelib chiqqan holda mineral o‘g‘itlarga bo‘lgan ilmiy asoslangan talabni aniqlash;

qishloq xo‘jaligi mahsulotlari ishlab chiqaruvchilariga sotiladigan mineral o‘g‘itlarning sifatini va saqlanishini nazorat qilish;

qishloq xo‘jaligi o‘simliklarini himoya qilish sohasida fan, ta'lim va ishlab chiqarish integratsiyasini chuqurlashtirish, ilg‘or xorijiy tajriba, ilm-fan yutuqlari va innovatsion texnologiyalarni keng joriy etish;

xorijiy davlatlarning qishloq xo‘jaligi o‘simliklarini himoya qilish bo‘yicha yetakchi universitetlari, ilmiy markazlari va boshqa tashkilotlarida kadrlarni qayta tayyorlash va malakasini oshirish, shuningdek, stajirovka o‘tash uchun buyurtmalar portfelini shakllantirish.

O‘zbekiston Respublikasi Qishloq xo‘jaligi vazirligi, Yer resurslari, geodeziya, kartografiya va davlat kadastri davlat qo‘mitasi, mahalliy davlat hokimiyati organlari hamda mulkchilik shaklidan qat'iy nazar barcha qishloq xo‘jaligi o‘simliklarini himoya qilish organlari va qishloq xo‘jaligi mahsulotlari ishlab chiqaruvchi sub'yektlar qishloq xo‘jaligi o‘simliklarini kasalliklar, zararkunanda hasharotlar va begona o‘tlardan himoya qilish uchun ekologik xavfsiz va uyg‘unlashgan qarshi kurashish usullarini qo‘llash hamda tuproqning unumdorlik darajasini saqlash va yaxshilash yuzasidan mas'ul ekanligi belgilab qo‘yiladi.

O‘zbekiston Respublikasi Qishloq xo‘jaligi vazirligi, Moliya vazirligi, Iqtisodiyot va sanoat vazirligi, Davlat aktivlarini boshqarish agentligi, “O‘zagrokimyohimoya” aksiyadorlik jamiyatining:

“O‘zagrokimyohimoya” aksiyadorlik jamiyati tarkibidagi “Agrokimyo stansiyasi” mas'uliyati cheklangan jamiyati va uning Qoraqalpog‘iston Respublikasi va viloyatlardagi hududiy filiallari, “Respublika Biosifat markaziy laboratoriyasi” mas'uliyati cheklangan jamiyati, Qoraqalpog‘iston Respublikasi va viloyatlardagi Chigirtka va tut parvonasiga qarshi kurashish xizmati filiallarini Agentlikka ular negizida davlat budjetidan moliyalashtiriladigan tegishli tashkilotlarni tashkil etish uchun berish;

“O‘zagrokimyohimoya” aksiyadorlik jamiyati tarkibidagi “O‘simliklarni himoya qilish ilmiy-tadqiqot instituti” mas'uliyati cheklangan jamiyatini ilmiy muassasa shaklida qayta tashkil etgan holda O‘zbekiston Respublikasi Qishloq xo‘jaligi vazirligi huzuridagi Qishloq xo‘jaligi va oziq-ovqat ta'minoti ilmiy-ishlab chiqarish markazi tasarrufiga o‘tkazish hamda “Respublika o‘quv-ishlab chiqarish biolaboratoriyasi” mas'uliyati cheklangan jamiyatining funksiyalari, majburiyatlari va mol-mulkini O‘simliklarni himoya qilish ilmiy-tadqiqot institutiga o‘tkazish;

qishloq xo‘jaligi o‘simliklarni himoya qilish sohasida ilmiy izlanishlar ko‘lamini kengaytirish, ilm-fan va ishlab chiqarish integratsiyasini chuqurlashtirish maqsadida 2020-2022 yillarda O‘simliklarni himoya qilish ilmiy-tadqiqot institutining Farg‘ona, Surxondaryo va Xorazm filiallarining moddiy-texnika bazasini mustahkamlash hamda Qoraqalpog‘iston Respublikasi, Qashqadaryo, Samarqand, Buxoro, Navoiy, Jizzax, Sirdaryo, Andijon va Namangan viloyatlarida filiallarni tashkil etish hamda bino va zarur asbob-uskunalar bilan jihozlash, shuningdek, mazkur ilmiy-tadqiqot instituti huzurida soha rahbarlari va mutaxassislarini qayta tayyorlash va malakasini oshirish markazini tashkil etish to‘g‘risidagi takliflari ma'qullanadi.

O‘zbekiston Respublikasi Davlat aktivlarini boshqarish agentligi, “O‘zdonmahsulot” aksiyadorlik kompaniyasi, “O‘zpaxtasanoat” aksiyadorlik jamiyati qishloq xo‘jaligi o‘simliklarida zararkunanda hasharotlarga qarshi kurashish uchun biologik usulni ko‘lamini kengaytirish, mavjud biolaboratoriyalardan unumli foydalanish va biomahsulotlar samaradorligini oshirish maqsadida “O‘zdonmahsulot” aksiyadorlik kompaniyasi va “O‘zpaxtasanoat” aksiyadorlik jamiyatining ustav kapitalidagi davlat ulushini kamaytirgan holda ularning tasarrufidagi mavjud biolaboratoriyalarni nol qiymatda Agentlikning hududiy bo‘linmalari tasarrufiga o‘tkazilishini ta'minlaydi.

Qishloq xo‘jaligi o‘simliklarini himoya qilish tizimini isloh qilish, servis xizmatlari sifatini oshirish, sohaga bozor mexanizmlarini joriy etish maqsadida o‘simliklarni himoya qilishni 2020 yil 1 maydan boshlab bosqichma-bosqich xususiy sektorga o‘tkazilishiga rozilik beriladi.

Bunda:

qishloq xo‘jaligi o‘simliklarini himoya qilish bo‘yicha xizmatlar ko‘rsatishni tartibga solish, o‘simliklarni himoya qilish vositalari va o‘g‘itlarni saqlash, tashish, realizatsiya qilish va qo‘llashda atrof-muhitning ifloslanishi va insonlarga zararli ta'sirining oldini olish maqsadida ushbu faoliyat bilan shug‘ullanish Agentlik tomonidan litsenziyalanadigan faoliyat turi hisoblanadi;

qishloq xo‘jaligi o‘simliklarini himoya qilish sohasida faoliyat yuritadigan xususiy sektorlar o‘simliklarni himoya qilish vositalarini respublika hududiga olib kirish, saqlash, tashish, realizatsiya qilish va ulardan foydalanish yuzasidan belgilangan qoidalar hamda tartiblarga rioya etishlari, mazkur vositalar qishloq xo‘jaligi mahsulotlarini va atrof-muhitni ifloslantirishiga yo‘l qo‘ymasliklari lozim;

favqulodda holatlar yuzaga kelganda qishloq xo‘jaligi o‘simliklarida kasalliklar, zararkunanda hasharotlar va begona o‘tlarga qarshi kurashish tadbirlarini o‘z vaqtida tizimli amalga oshirish uchun hududlarda servis xizmatini ko‘rsatuvchi xususiy sektorlar faoliyati to‘liq yo‘lga qo‘yilgunga qadar Agentlik tomonidan servis xizmatlari ko‘rsatiladi;

xususiy sektorda qishloq xo‘jaligi o‘simliklarini himoya qilish bo‘yicha xizmatlar ko‘rsatish to‘liq joriy etilgunga qadar ushbu turdagi xizmatlar tumanlar O‘simliklarni himoya qilish bo‘limlari tomonidan tashkil etiladigan xo‘jalik hisobida faoliyat yuritadigan “O‘simliklarni himoya qilish xizmati” mas'uliyati cheklangan jamiyatlari tomonidan amalga oshiriladi;

qishloq xo‘jaligi o‘simliklarini himoya qilish bo‘yicha xizmatlar ko‘rsatuvchi xususiy sektorlar xavfli fitosanitariya oqibatlariga olib kelishi mumkin bo‘lgan vaziyatlar yuzaga kelganda Agentlikni xabardor qilishlari shart.

Belgilanishicha:

a) Agentlik o‘z faoliyati bo‘yicha O‘zbekiston Respublikasi Qishloq xo‘jaligi vazirligiga hisobot beradi;

b) Agentlikning o‘z vakolatlari doirasida qabul qiladigan qarorlari davlat va xo‘jalik boshqaruvi organlari, mahalliy ijroiya hokimiyati organlari, shuningdek, korxonalar, tashkilotlar, klasterlar, yerdan foydalanuvchilar va fuqarolar tomonidan bajarilishi majburiy hisoblanadi;

v) Agentlik xodimlari qishloq xo‘jaligi uchun mo‘ljallangan yerlarga, shu jumladan bog‘ va tokzorlarga, klaster, fermer, dehqon xo‘jaliklari va tomorqa yerlariga, davlat o‘rmon fondi yerlariga, chegara hududlariga, shuningdek, issiqxonalarga moneliksiz kirish va fitosanitar nazoratni yuritish huquqiga ega;

g) Agentlik xodimlariga O‘zbekiston Respublikasi Qishloq xo‘jaligi vazirligi markaziy apparati xodimlari uchun belgilangan mehnatga haq to‘lash, moddiy rag‘batlantirish va ijtimoiy himoya shartlari tatbiq etiladi;

d) Agentlik va uning tizim tashkilotlarini hamda hududiy bo‘linmalarini moliyalashtirish manbasi etib O‘zbekiston Respublikasi Davlat budjeti va qonun hujjatlari bilan taqiqlanmagan boshqa manbalar belgilanadi;

ye) Agentlik direktori:

O‘zbekiston Respublikasi qishloq xo‘jaligi vazirining taqdimnomasiga binoan Vazirlar Mahkamasi tomonidan lavozimga tayinlanadi va lavozimidan ozod etiladi;

maqomi, mehnatga haq to‘lash, tibbiy va transport xizmati ko‘rsatish shartlari bo‘yicha vazir o‘rinbosariga tenglashtiriladi;

j) Agentlik direktorining o‘rinbosarlari Agentlik direktorining taqdimnomasiga binoan O‘zbekiston Respublikasi qishloq xo‘jaligi vaziri tomonidan lavozimga tayinlanadi va lavozimidan ozod etiladi.

Agentlik:

O‘zbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda 2020-2023 yillar mobaynida tuproqning agrokimyoviy holati, agrokimyoviy xaritanomalar, mineral o‘g‘itlarning turlari bo‘yicha ehtiyojlar, qishloq xo‘jaligi o‘simliklarida kasalliklar, zararkunanda hasharotlar va begona o‘tlarning konturlar kesimida tarqalish bashoratlari, shuningdek, mulkchilik shaklidan qat'iy nazar barcha biofabrikalar, biomarkazlar, biolaboratoriyalar tomonidan biomahsulotlarni tarqatilishi to‘g‘risidagi hamda xizmatda foydalanish uchun zarur bo‘ladigan boshqa ma'lumotlar kiritilgan “plantprotection.uz” elektron axborot bazasi yaratilishini;

GPS qurilmalaridan foydalangan holda tuproqning agrokimyoviy tahlil ishlari amalga oshirilishini va sohada bosqichma-bosqich raqamli agrokimyo tizimi yo‘lga qo‘yilishini;

qishloq xo‘jaligi o‘simliklarida zararli organizmlarning rivojlanishi va tarqalishi muddatlari hamda ularga qarshi uyg‘unlashgan kurashish tizimi hamda tumanlar kesimida qishloq xo‘jaligi uchun mo‘ljallangan yerlarda tuproqlarning agrokimyoviy holati to‘g‘risidagi ochiq ma'lumotlarni o‘zining rasmiy veb-saytida joylashtirilishini va doimiy yangilab borilishini;

qishloq xo‘jaligi o‘simliklarini zararkunanda hasharotlardan kam xarajat talab etadigan biologik usulda himoya qilishni kuchaytirish, sifatli, tabiiy, ekologik toza qishloq xo‘jaligi mahsulotlari hajmini oshirish, tabiatdagi biofonlarning yo‘q bo‘lib ketishining oldini olish maqsadida biolaboratoriyalarni bosqichma-bosqich zamonaviy asbob-uskunalar bilan jihozlash bo‘yicha zaruriy chora-tadbirlar amalga oshirilishini;

O‘zbekiston Respublikasi Tashqi ishlar vazirligi, Innovatsion rivojlanish vazirligi, Oliy va o‘rta maxsus ta'lim vazirligi bilan birgalikda qishloq xo‘jaligi o‘simliklarini himoya qilish va tuproqning agrokimyoviy tahlil tizimini rivojlantirish maqsadida xalqaro aloqalarni kuchaytirish, xorijiy ekspertlarni jalb qilish, sohadagi rahbar va mutaxassislarni tayyorlashning innovatsion usullarini joriy etish, xorijiy davlatlarda malakasini oshirish va stajirovka o‘tashni yo‘lga qo‘yilishini;

O‘zbekiston Respublikasi Investitsiyalar va tashqi savdo vazirligi, Davlat-xususiy sheriklikni rivojlantirish agentligi, Qoraqalpog‘iston Respublikasi Vazirlar Kengashi, viloyatlar hokimliklari bilan birgalikda har bir tumanda davlat-xususiy sheriklik shartlari asosida zamonaviy “mobil diagnostika laboratoriyalari” va malakali kadrlar bilan butlangan o‘simliklar klinikalari tashkil etilishini;

zararli chigirtka va tut parvonasiga qarshi kurashish tadbirlarini o‘z vaqtida amalga oshirilishini hamda Davlat budjetidan ajratilgan mablag‘larni maqsadli sarflanishini ta'minlaydi.

O‘zbekiston Respublikasi Moliya vazirligi:

a) qishloq xo‘jaligi uchun mo‘ljallangan yerlarda tuproqlarning agrokimyoviy xaritanomalarini ishlab chiqish xarajatlari bojxona to‘lovlari va qo‘shilgan qiymat solig‘i tushumlaridan tushgan mablag‘lar hisobidan moliyalashtirilishini ta'minlasin. Bunda har to‘rt yilda tuproqning agrokimyoviy xaritanomalarini qayta yangilab borish uchun talab etiladigan mablag‘lar ajratilishi nazarda tutiladi;

b) Agentlik buyurtmanomalari asosida uning Qoraqalpog‘iston Respublikasi va viloyatlar hamda tumanlardagi bo‘linmalarining prognoz laboratoriyalari, biolaboratoriyalari va biofabrikalarini kapital ta'mirlash hamda ishchi jihozlar bilan butlash, zamonaviy laboratoriya asbob-uskunalari bilan jihozlash hamda zararli organizmlarning ommaviy tarqalishini bartaraf etish uchun o‘simliklarni himoya qilish vositalarini strategik zaxirasini yaratish xarajatlariga O‘zbekiston Respublikasi Davlat budjetidan mablag‘lar ajratsin va Davlat budjeti xarajatlarining har yilgi parametrlarini shakllantirishda ushbu tadbirlarni amalga oshirish uchun zarur mablag‘larni nazarda tutadi;

v) Respublika agrokimyoviy tahlil markazi tizimidagi laboratoriyalarni zamonaviy asbob-uskunalar bilan butlash maqsadida Qoraqalpog‘iston Respublikasi va viloyatlar “Agrokimyohimoya” hududiy aksiyadorlik jamiyatlari tomonidan “Agrokimyo stansiyasi” MChJ uchun sotib olingan jami 8,5 mlrd so‘m miqdoridagi asbob-uskunalarni Agentlik balansiga o‘tkazilishini ta'minlaydi;

g) Agentlik markaziy apparatiga 3 ta xizmat va 3 ta maxsus avtotransport va uning Qoraqalpog‘iston Respublikasi hamda viloyatlar boshqarmalariga 2 tadan hamda tuman bo‘limlariga 1 tadan xizmat avtotransport vositasi va agronom-entomologlarga “tezkor fitonazorat” xizmatini amalga oshirish maqsadida 3 tadan maxsus mashina, jami 511 ta transport vositalari uchun mablag‘lar ajratilishini ta'minlaydi.

O‘zbekiston Respublikasi Qishloq xo‘jaligi vazirligi Oliy va o‘rta maxsus ta'lim vazirligi hamda mahalliy davlat hokimiyati organlari bilan birgalikda kadrlarga bo‘lgan ehtiyojdan kelib chiqqan holda 2020-2021 o‘quv yilidan boshlab Qishloq xo‘jaligi vazirligi tizimidagi kasb-hunar kollejlarida agronom-entomolog hamda tuproqshunos-agrokimyogar mutaxassislari tayyorlanishini yo‘lga qo‘yadi.

O‘zbekiston Respublikasida ishlab chiqarilmaydigan, belgilangan tartibda tasdiqlanadigan ro‘yxat bo‘yicha Agentlik va uning tizimidagi tashkilotlar tomonidan import qilinadigan laboratoriya asbob-uskunalari va butlovchi qismlariga bojxona to‘lovlari (bojxona yig‘imlari bundan mustasno) 2024 yil 1 yanvargacha 50 foizga kamaytiriladi.

Agentlik Toshkent shahar, Nukus ko‘chasi, 77-uy manzilidagi binoda operativ boshqarish huquqi asosida joylashtiriladi.