Oʻzbekiston prezidenti tadbirkorlar bilan ochiq muloqotida belgilangan vazifalarni amalga oshirish toʻgʻrisida farmon imzoladi.
Farmonga asosan, tadbirkorlarga quyidagi soliq yengilliklari berilishi kutilmoqda:
bozor va savdo komplekslarida xizmat koʻrsatishdan olingan foyda uchun foyda soligʻi stavkasi amaldagi 20 foizdan 15 foizga tushiriladi;
yangi tashkil etilgan qishloq xoʻjaligi korxonalari bevosita qishloq xoʻjaligida foydalaniladigan obyektlar boʻyicha joriy soliq davrida mol-mulk soligʻidan ozod qilinadi;
oilaviy nodavlat maktabgacha taʼlim tashkilotlarini ochgan yakka tartibdagi tadbirkorlar mazkur bogʻchalar faoliyatida foydalaniladigan hamda ushbu yakka tartibdagi tadbirkorlar egaligida boʻlgan noturar bino va yer uchastkalari boʻyicha mol-mulk soligʻi hamda yer soligʻidan ozod qilinadi;
jinoyat-protsessual kodeksiga soliq maslahatchilari soliq toʻlovchining vakili sifatida qatnashishi mumkinligi bilan bogʻliq oʻzgartirishlar kiritiladi;
yuridik shaxsning jismoniy shaxs boʻlgan taʼsischisi tomonidan ushbu yuridik shaxsga ijaraga yoki tekin foydalanishga berilgan koʻchmas mulk obyektlariga nisbatan ijara toʻlovining eng kam miqdori qoʻllanmaydi.
Yuqoridagilarni oʻz ichiga olgan qonun loyihasi 2026-yil dekabr oyida tayyor boʻlishi kerak.
