BMT nochor davlatlarni koronavirusga qarshi kurashda qo‘llab-quvvatlash jamg‘armasini tashkil etadi 

Ma'ruza koronavirus pandemiyasining ijtimoiy-iqtisodiy oqibatlariga global javob berish mavzusiga bag‘ishlangan.  

Ta'kidlanishicha, BMT jamg‘armani o‘rta va past daromadli davlatlarga koronavirus pandemiyasi bilan bog‘liq favqulodda vaziyatga javoban harakat qilish, ularga ijtimoiy-iqtisodiy shokdan tiklanishga yordam berish maqsadida tashkil etmoqda.

Ma'ruzada 13 mart kuni Jahon sog‘liqni saqlash tashkiloti, BMT jamg‘armasi va Shveytsariya xayriya jamg‘armasi koronavirus oqibatlariga javob beruvchi o‘ziga xos ilk jamg‘arma ta'sis etgani ma'lum qilingan. Bu jamg‘arma dunyoning istalgan nuqtasidagi xususiy shaxslar, korporatsiyalar va tashkilotlarga koronavirus va uning oqibatlariga qarshi kurash bo‘yicha sa'y-harakatlarda ishtirok etish uchun birlashishga imkon beradi. 

“Yig‘ilgan mablag‘lar sog‘liqni saqlash tizimi xodimlariga o‘z ishini bajarish, bemorlarni davolash hamda kasallikni davolash va undan vaksina yaratish sohasidagi tadqiqotlarni o‘tkazishga yordam beradi. Bugungi kunda 200 mingdan ko‘proq xususiy shaxslar va tashkilotlar bu jamg‘armaga o‘z hissasini qo‘shib, 95 mln dollardan ko‘proq mablag‘ to‘plashga muvaffaq bo‘lingan”, deyilgan BMT bosh kotibi ma'ruzasida.  

Avvalroq Guterresh dunyoning eng nochor davlatlarida koronavirusga qarshi kurashni moliyalashtirish uchun 2 mlrd dollarlik gumanitar javob rejasi amalga oshirilishini ma'lum qilgan. Gumanitar reja doirasida nochor davlatlarga virus bor-yo‘qligini aniqlovchi test o‘tkazish uchun zarur laborator qurilmalar va bemorlarni davolash uchun dori-darmonlar yetkaziladi. Bundan tashqari, ushbu davlatlarda lagerlar va aholi yashash joylarida qo‘llarni yuvish uchun stansiyalar o‘rnatiladi.