18:34 / 06.04.2020
42856
Коронавирусга қарши графенли электр ниқоблар тақдим этилди

LIGC Applications компанияси асоси графендан иборат, фильтрлаш тизимига эга юз ниқобини ишлаб чиқди. Уни стериллаш ва қайта фойдаланиш мумкин.

Фото: LIGC Applications

Янги ниқоб коронавирус, бактерия ва бошқа зарарли организмларга қарши курашда самарали воситага айланиши айтилмоқда.

LIGC Applications компанияси маълумотига кўра, Guardian G-Volt ниқоби бу «ҳаво орқали юқадиган вирус ва бактерияларга қарши курашда бир қадам олға ҳаракатдир», чунки у графеннинг антибактериал ва ўтказувчанлик хусусиятларидан фойдаланади

Guardian G-Volt 0,3 микрометрдан катта ҳажмдаги зарраларга қарши 99 фоизлик, ундан кичикроқ зарраларга қарши эса 80 фоизлик самарага эга.

Таққослаш учун: N95 респиратор ниқоб 0,3 микрометр ўлчамдаги зарраларнинг 95 фоизини блоклайди.

G-Volt Guardian USB порти орқали қувватланиш манбайига уланганида ундан паст даражадаги электр қуввати ўтади. Бу заряд графенли ниқоб томонидан ушлаб олинган зарраларни йўқ қилади. Шу тариқа, ниқоб тўлиқ стерилланади, ундан қайта фойдаланиш мумкин бўлади.

Коронавирус бутун дунёда авж олгани сабабли N95 респиратор ниқоблар самарадорлигига шубҳа пайдо бўлди. Бундай ниқоб нам бўлиши билан уни утилизация қилиш ва янгисига алмаштириш керак.

LIGC Applications халқаро ҳамкорлик бўлими раҳбари Йосси Левиннинг маълум қилишича, бундай ниқобни тайёрлаш устида йиллар давомида иш олиб борилган ва Исроилдаги Бен-Гурион ҳамда АҚШдаги Райс университетида тажрибалар ўтказилган.

«Биз биринчи навбатда олимлармиз. Биз учун мазкур технологияни қийин вазиятларда қўллаш имкониятига эга бўлиш катта аҳамиятга эга».

Жаҳон соғлиқни сақлаш ташкилоти ҳозирги кунда коронавирусга чалинган беморлар билан бевосита мулоқот қиладиган ва йўталаётган кишиларгагина ниқоб тақишни маслаҳат бермоқда.

Ниқоблар вируснинг бурун ва оғиз орқали одам организмига киришидан ҳимоя қилиши мумкин. Бироқ уни кўзлар орқали юқтириб олиш эҳтимоли ҳам мавжуд. Қўлларни мунтазам совунлаб ювиш коронавирусдан самарали ҳимоя саналади.

Графен – қалинлиги атомга тенг бўлган материал. У антибактериал хусусиятга эга. Шунинг учун, Guardian G-Volt фойдаланувчини бактериялардан ҳам ҳимоя қилиши мумкин.

Графен икки ўлчамли материал ҳисобланади. Графендан амалий мақсадларда фойдаланиш учун уни уч ўлчамли шаклга ўзгартириш зарур. Бу лазер ёрдамида амалга оширилади. Ниқобда асоси графендан иборат микроғовакли кўпикдан фойдаланилади. У бактерияларни ушлаб қола олади ва ниқоб юзасини стериллаш учун зарур бўлган электр токини ўтказади.

Светодиод ниқобни алмаштириш ҳақида огоҳлантиради.

LIGC Applications графенли фильтр ва ниқобларни Бельгияда ишлаб чиқаради.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top