Maqsadsiz foydalanilgan 52ta stiker bekor qilindi. Mashinalar jarima maydonchasiga qo‘yildi

Ma'lum qilinishicha, joriy yilning 6 aprel soat 18:00 ga qadar Davlat xizmatlari markazlariga avtomobilda harakatlanish uchun maxsus ruxsatnoma talab etib, jami 168 ming 521ta ariza kelib tushgan. Shundan, 163 ming 444ta ko‘rib chiqilib, 28 ming 73tasi qanoatlantirilgan (16,7 foiz), 135 ming 371tasi esa rad etilgan (80,3 foiz).

Qayd etilishicha, 6 aprel kuni soat 20.00dan 7 aprel soat 6.00ga qadar Toshkent shahar Ichki ishlar bosh boshqarmasi Yo‘l harakati xavfsizligi boshqarmasi va Toshkent shahar Davlat xizmatlari markazlari o‘zaro hamkorlikda o‘tkazilgan avtotransport vositalari uchun berilgan stikerlardan maqsadli foydalanishi ustidan nazorat-reyd tadbirlari natijasida 52ta stiker bekor qilinib, avtomashinalar jarima maydoniga qo‘yildi.

«Bu kabi nazorat-reyd tadbirlari muntazam ravishda respublikaning barcha hududlarida o‘tkazilishi haqida ogohlantiramiz», - deyiladi DXA xabarida.

Ma'lumot uchun, O‘zbekiston Respublikasiga koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo‘yicha respublika maxsus komissiyasining 2020 yil 30 martdagi 13-son bayoniga asosan Adliya vazirligi hamda Davlat xizmatlari markazlari tomonidan avtotransport vositalari harakatlanishiga maxsus ruxsatnomalar (stiker) berilishi yo‘lga qo‘yilgandi.