Eksportchilar uyushmasi raisining Kun.uz'da e'lon qilingan murojaatidan so‘ng, Farg‘onada tadbirkorlarning transportda harakatlanishiga qo‘yilgan cheklov olib tashlandi

1 avgust kuni Kun.uz saytida O‘zbekiston Eksportchilari uyushmasi raisi Muxtor Umarovning mahalliy hokimliklarga murojaati e'lon qilingan edi.

Uyushma rahbari ushbu murojaatida joylarda tadbirkor va eksportchilar faoliyatiga nisbatan mahalliy hokimliklar tomonidan ko‘plab sun'iy to‘siqlar qo‘yilayotganini Farg‘ona viloyati misolida tanqid qilib, hokimlardan bu to‘siqlarni olib tashlashni so‘ragandi.

Murojaat e'lon qilinganidan bir kun o‘tib, 2 avgust kuni Umarov tahririyatimiz bilan qayta bog‘landi va bu borada muammolar o‘z yechimini topganini bildirdi.

«1 avgust kuni farg‘onalik tadbirkorlarning qonun doirasida (stikerlari bo‘la turib) yo‘llarda erkin harakatlana olmayotganlari bo‘yicha uyushmamiz murojaati e'lon qilingan edi. Bizni xursand qilgan jihati, unga nisbatan mas'ul idoralar tezkorlik bilan reaksiya bildirishdi. Jumladan, Davlat bojxona qo‘mitasi, Biznes-ombudsman, Adliya vazirligi vakillari uyushmamiz bilan bog‘lanib, joylardagi tadbirkorlarning ushbu muammolari tez orada hal qilinishini bildirishdi», – dedi Umarov.

Uning so‘zlariga ko‘ra, 2 avgustdan boshlab avtomobilda erkin harakatlanish uchun maxsus stikerga ega va «Yashil yo‘lak» dasturi bo‘yicha ro‘yxatdan o‘tgan farg‘onalik tadbirkorlar yo‘llarda erkin harakatlana boshlagan.

«Ular mahsulotini ichki bozorlarda ham eksportga yo‘naltira boshlashdi. Bu iqtisodiyot rivojida juda muhim ish. Hozir tadbirkorlardan hukumatga va ushbu muammoning hal bo‘lishida o‘z hissasini qo‘shganlarga minnatdorchilik bildirilgan xabarlarini olmoqdamiz», – dedi Eksportchilar uyushmasi rahbari.