Karantin uchun huquqiy asos mavjud – Adliya vazirligi

Karantinga qay tartibda olish bo‘yicha huquqiy asos bormi?

Albatta bor. “Aholining sanitariya-epidemiologik osoyishtaligi to‘g‘risida”gi Qonunga muvofiq, O‘zbekiston Respublikasi hududining sanitariya muhofazasi sanitariya-karantin nazoratini amalga oshirish va cheklovchi tadbirlar ya'ni karantin joriy etish yo‘li bilan ta'minlanadi.

Shuningdek, Vazirlar Mahkamasining 2020 yil 23 martdagi 

176-son qarori bilan Koronavirus infeksiyasi aniqlanganda (gumon qilinganda) bajariladigan profilaktik va epidemiyaga qarshi chora-tadbirlarni amalga oshirish tartibi to‘g‘risidagi nizom tasdiqlangan.

Nizomda koronavirus infeksiyasiga gumon qilingan bemorlar aniqlanganda davlat organlari va boshqa tashkilotlarining harakatlanish tartibi, koronavirusga gumon qilingan bemor uyda va tibbiyot muassasasida aniqlanganda harakatlanish tartibi hamda koronavirus infeksiyasiga gumon qilingan shaxslar uchun karantin belgilash tartiblari aniq belgilab berilgan.

Nizomga ko‘ra, koronavirus infeksiyasi aniqlangan shaxslar bilan yaqin muloqotda bo‘lgan shaxslar provizor gospital (koronavirus infeksiyasiga gumon qilingan shaxslarni saqlash 

va davolash uchun yuqumli kasalliklar shifoxonasi yoki boshqa tibbiyot muassasasi bazasida tashkil etilgan davolash muassasasi) yoki izolyatorga (yuqumli kasalliklar shifoxonasi yoki boshqa alohida ajratilgan binolarning maxsus jihozlangan xonasi) joylashtiriladi.

Koronavirus infeksiyasi aniqlangan shaxslar bilan muloqotda bo‘lgan shaxslar esa uy karantinida saqlanadilar.

Fuqarolik ishlari bo‘yicha sudlarga onlayn ya'ni elektron murojaat qilsa bo‘ladimi? Agar mumkin bo‘lsa, buni qanday qilish kerak?

"E-XSUD" tizimi orqali murojaat qilish mumkin.

Mazkur tizim respublika sudlariga murojaatlarni "E-XSUD" axborot tizimi orqali taqdim etish, mazkur murojaatlar yuzasidan olib borilgan protsessual harakatlar va ularning natijalari yuzasidan xabardor qilish imkonini beradi

Har bir viloyat tumanlarda koronavirus bo‘yicha shtab tashkil qilingan. Shtab a'zolari qo‘llab quvvatlanib moddiy rag‘batlantirish berilib turiladimi?

Prezidentning 2020 yil 19 martdagi “Koronavirus pandemiyasi va global inqiroz holatlarining iqtisodiyot tarmoqlariga salbiy ta'sirini yumshatish bo‘yicha birinchi navbatdagi chora-tadbirlar to‘g‘risida”gi PF–5969-son Farmonida tibbiyot, sanitariya-epidemiologik va boshqa xodimlar koronavirus infeksiyasi tarqalishiga qarshi kurashish tadbirlariga jalb qilinadigan davrda ularning oylik lavozim maoshiga 6 foiz miqdorida har kunlik qo‘shimcha to‘lovlar joriy qilish belgilangan.

Shuningdek, O‘zbekiston Respublikasi Prezidentining 2020 yil 26 martdagi “Koronavirus pandemiyasi va global inqiroz holatlarining iqtisodiyot tarmoqlariga salbiy ta'sirini yumshatish bo‘yicha birinchi navbatdagi chora-tadbirlar to‘g‘risida”gi PQ–4652-son qarorida, koronavirus infeksiyasidan zararlangan bemorlar bilan muloqotga kirishadigan, zararlangan bemorlar joylashtirilgan obektlarda hamda koronavirus infeksiyasini aniqlash laboratoriyalarida faoliyat olib borayotgan tibbiyot, sanitariya-epidemiologiya xizmati va boshqa xodimlarga har 14 kunlik faoliyat davri uchun: 

vrach xodimlarga, vrach-laborantlarga — 25 million so‘m;

o‘rta tibbiyot xodimlariga, hamshira-laborantlarga — 15 million so‘m;

kichik tibbiyot xodimlariga — 10 million so‘m;

boshqa xodimlarga — 5 million so‘m miqdorda maxsus qo‘shimcha rag‘batlantirish to‘lovi belgilangan.

Bundan tashqari, koronavirus infeksiyasi tarqalishiga qarshi kurashish doirasida bemorlar bilan ishlagan vaqtida koronavirus infeksiyasi yuqtirib olgan tibbiyot, sanitariya-epidemiologiya xizmati va boshqa xodimlarga 100 mln so‘m, koronavirus infeksiyasi tarqalishiga qarshi kurashish doirasida bemorlar bilan ishlagan vaqtida koronavirus infeksiyasini yuqtirish natijasida og‘ir ahvolga tushgan va sog‘lig‘i tiklanmagan taqdirda tibbiyot, sanitariya-epidemiologiya xizmati va boshqa xodimlarga yoki ularning oila a'zolariga 250 mln so‘m bir martalik to‘lov to‘lanishi belgilangan.