Braziliyadagi bir nechta shaharda ilk bor karantin choralari joriy etildi

Braziliyada koronavirus epidemiyasi avj olishi munosabati bilan bir nechta shaharda ilk bor karantin  choralari joriy etildi. Maranyan shtati ma'muriy markazi San-Luis va shtatning yana uchta shahrida 5 maydan boshlab o‘ta zarur bo‘lmagan har qanday faoliyat turi o‘n kunga to‘xtatildi. Bu haqda San-Luis sudi qarorida aytilmoqda.

Qayd etilishicha, San-Luisdagi davlat klinikalarining intensiv terapiya bo‘limlaridagi barcha 112ta joy bemorlar bilan to‘lgan. Duglas di Melu Martins G1 internet portaliga intervyu berar ekan, "kimlardir o‘layotganida boshqalar o‘yin-kulgi qilayotgani" sababli ushbu qarorni qabul qilganini aytdi.  

Mamlakat sog‘liqni saqlash vazirligining ma'lumotlariga ko‘ra, Braziliyada koronavirusga chalinganlar soni 85 mingdan oshgan, 5901 kishi vafot etgan. Ko‘plab shaharlarda kasalxonalarda bemorlarga joy qolmagan, vafot etganlarni ko‘mish uchun umumiy qabrlar qazilmoqda.

Braziliya prezidenti Jair Bolsonaru esa vaziyatni hali ham jiddiy qabul qilmayapti va tezroq odatiy hayot tarziga qaytishni talab qilmoqda. 

Bolsonaru 30 aprel kuni Portu-Alegri shahrida generallardan birining sharafiga uyushtirilgan marosimda qatnashdi. Boshqa generallar marosim qahramoni bilan tirsaklari orqali ko‘rishgan bir paytda niqobsiz Bolsonaru barcha bilan namoyishkorona tarzda qo‘l siqishib ko‘rishdi.

Avvalroq Jair Bolsonaru epidemiyani «kichikroq gripp» deb atagan va shtatlar gubernatorlarini cheklov choralari kiritgani uchun tanqid qilgandi.