Braziliyaning Embraer kompaniyasi Oʻzbekiston Harbiy-havo kuchlariga birinchi C-390 Millennium samolyotini topshirdi.
Marosim kompaniyaning Braziliyadagi korxonasida Oʻzbekiston Harbiy-havo kuchlari qoʻmondoni general-mayor Ahmad Burhonov ishtirokida boʻlib oʻtdi.
Oʻzbekiston Markaziy Osiyoda C-390 Millennium samolyotining birinchi foydalanuvchisiga aylandi.
Samolyot 26 tonnagacha yuk tashish, 470 uzel tezlikka erishish va uzoq masofalarga parvoz qilish imkoniyatiga ega. U yuk va harbiy xizmatchilarni tashish, desant tashlash, tibbiy evakuatsiya, qidiruv-qutqaruv operatsiyalari, yongʻinni oʻchirish va gumanitar missiyalar uchun moʻljallangan, shuningdek, havoda boshqa samolyotlarga yoqilgʻi quyish uchun ham ishlatilishi mumkin.
Embraer kompaniyasi va Oʻzbekiston Harbiy-havo kuchlari oʻrtasida 2024-yil oxirida tuzilgan shartnoma, shuningdek, oʻqitish, texnik qoʻllab-quvvatlash va ehtiyot qismlarni yetkazib berishni ham koʻzda tutadi.
