Venesuelada qo‘lga olingan amerikaliklarga terrorizm ayblovi qo‘yiladi 

Venesuelaga noqonuniy ravishda kirishga uringan chog‘ida qo‘lga olingan AQSh fuqarolari boshqa gumondorlar singari terrorizm ishi bo‘yicha ayblanuvchiga aylanadi. Bu haqda Venesuela bosh prokurori Tarek Vilyam Saab ma'lum qildi.

"AQShning qo‘lga olingan fuqarolariga terrorizm, fitna, noqonuniy qurol kontrabandasi va jinoiy uyushma tuzish ayblovlari qo‘yiladi", - dedi Saab. 

Uning so‘zlari Venesuela bosh prokuraturasining rasmiy Twitter sahifasida keltirilmoqda.

Saabning so‘zlariga ko‘ra, mamlakatga noqonuniy kirishga urinishda ishtirok etgan Venesuela fuqarolari esa sud oldida terrorizm, xorijiy hukumat fitnasida qatnashish, vatanga xiyonat, qurol kontrabandasi, terrorizmni moliyalashtirish va jinoiy uyushma tuzish ayblovlari bo‘yicha javob beradi.

Venesuela ichki ishlar vaziri Nestor Reverol 3 may kuni dengiz tomondan kolumbiyalik jangarilar hujumi qaytarilganini ma'lum qilgandi. Ma'lumotlarga ko‘ra, jangarilar Venesuelaga tezyurar katerlarda bostirib kirmoqchi bo‘lgan. Keyinroq hujumni qaytarish vaqtida 8 kishi qo‘lga olingani, 2 kishi yo‘q qilingani ma'lum qilingan. 

Venesuela prezidenti Nikolas Maduroning ma'lum qilishicha, hujum ishtirokchilari orasida ikki amerikalik - AQSh prezidenti shaxsiy qo‘riqlash xizmati xodimlari bo‘lgan.

Maduro davlat televideniyesi efiri orqali ularning Lyuk Aleksandr Denman va Ayran Berri nomlariga rasmiylashtirilgan hujjatlarini namoyish etgan. 

“Biz Venesuelaga yetib borib, Karakasga tushishimiz va aeroportni bosib olishimiz kerak edi. Biz olgan ko‘rsatmalar prezident Maduroni samolyotga xavfsiz o‘tkazishni ta'minlash uchun aeroportni bosib olishni o‘z ichiga olgan”, deb aytgan Denman so‘roq chog‘ida.