O‘zbekiston Afg‘oniston rahbariyati o‘zaro siyosiy kelishuvga erishganini qo‘llab-quvvatladi

O‘zbekiston Afg‘onistonning siyosiy yetakchilari tomonidan inklyuziv hukumat va Milliy yarashuv bo‘yicha Oliy kengashni tashkil etish to‘g‘risidagi kelishuvga erishilganini qo‘llab-quvvatladi. Bu haqda Tashqi ishlar vazirligi ma'lum qildi.

Avvalroq, Afg‘oniston prezidenti Ashraf G‘ani o‘zining siyosiy raqibi Abdulloh Abdulloh bilan hokimiyatni bo‘lib olish bo‘yicha kelishuv tuzgandi. 

«Umid qilamizki, ushbu muhim qarorlar qo‘shni Afg‘onistonda siyosiy muzokaralarga hamda mustahkam va uzoq muddatli tinchlikka yo‘l ochadi.

O‘z navbatida, O‘zbekiston Afg‘oniston xalqi bilan do‘stlik va yaxshi qo‘shnichilik munosabatlarini mustahkamlashda, afg‘onlararo siyosiy jarayonni har tomonlama qo‘llab-quvvatlashda hamda tinch va farovon Afg‘onistonni barpo etish uchun har jihatdan yordam berishda davom etadi», - deyiladi O‘zbekiston Tashqi ishlar vazirligi bayonotida.

Afg‘onistonda prezidentlik saylovlarigacha bo‘lgan balans tiklandi. «Tolibon» harakati bilan muzokaralar tiklanadigan bo‘lsa, hukumat nomidan Abdulloh Abdulloh ishtirok etadi.

Eslatib o‘tamiz, o‘tgan yilning sentabr oyidagi prezidentlik saylovlaridan keyin ikki nomzod ham prezidentlik uchun qasamyod qilgandi: amaldagi prezident Ashraf G‘ani ham, mamlakat bosh vaziri Abdulloh Abdulloh ham saylovda g‘alaba qozonganini e'lon qilgandi. Afg‘oniston markaziy saylov komissiyasi G‘ani saylovda kichik farq bilan g‘alaba qozonganini ma'lum qilgandi, ammo Abdulloh natijalar soxtalashtirilganini aytgandi.