Mutaxassislarni tayyorlash va kasbiy bilimlarni qayta baholash tizimlashtiriladi

Hujjat bilan Milliy malakalar ramkasi hamda Kasbiy malakalar, bilim va ko‘nikmalarni rivojlantirish milliy tizimi to‘g‘risidagi nizom tasdiqlandi.
 
Norma’ning yozishicha, Bandlik va mehnat munosabatlari vazirligiga ikki hafta muddatda quyidagilarni ishlab chiqish topshirildi:

Vazirlik huzuridagi Kasbiy malakalarni rivojlantirish respublika kengashi reglamenti;

Davlat boshqaruvi organlari va xo‘jalik birlashmalari huzuridagi kasbiy bilim hamda ko‘nikmalarni rivojlantirish bo‘yicha tarmoqlar kengashlari haqidagi namunaviy nizomni, shuningdek tarmoqlar malaka ramkalari va kasb standartlarini shakllantirish va amaliyotga joriy etish bo‘yicha uslubiy tavsiyalar.
 
Axborot texnologiyalari va kommunikatsiyalarini rivojlantirish vazirligi bilan birgalikda bir oy muddatda Kompetensiyalarni baholash bo‘yicha faoliyat bilan shug‘ullanuvchi yuridik shaxslar registri, Kasb standartlari milliy registri hamda Tasdiqlangan malakaga ega shaxslar milliy registri ishlab chiqiladi. Oxiridagi registrga mutaxassislar ixtiyoriy asosda kiritiladi.
 
Xizmatchilarning asosiy lavozimlari va ishchi kasblari klassifikatoriga ta'lim tizimini takomillashtirish, Milliy va tarmoqlar ramkalari, Oliy ta'lim yo‘nalishlariga bevosita aloqador bo‘lgan tegishli o‘zgartirishlar kiritib boriladi.
 
Milliy malakalar ramkasi mehnat bozori va ta'lim sohasini integratsiyalash vositasi bo‘lib xizmat qiladi. Ramka jadval ko‘rinishida tuzilgan bo‘lib, unda har bir malaka darajasi bo‘yicha kasb faoliyatini amalga oshirish uchun talab qilinadigan bilimlar, mahorat va ko‘nikma, shaxsiy va kasbiy kompetensiyalar, shuningdek tegishli malaka darajasini egallash yo‘llari belgilanadi.
 
Ushbu tizimning asosiy vazifalaridan biri kasbga o‘qish, malaka oshirish va qayta o‘qishni, ishsizlar va band bo‘lmagan aholini, ayniqsa yoshlarni kasbga o‘qitish, malakasini oshirish va qayta o‘qitishni tashkil etishdan iborat.
 
Milliy malakalar ramkasi asosida davlat boshqaruvi organlari va xo‘jalik birlashmalari tomonidan ish beruvchilar birlashmalari bilan hamkorlikda tarmoqlar malaka ramkalari ishlab chiqiladi va tasdiqlanadi.

Hujjat 16.05.2020 yildan kuchga kirdi.