Hukumatning «Oʻzbekiston Respublikasida ekskursiya xizmatlarini yanada takomillashtirish chora-tadbirlari toʻgʻrisida»gi qarori (468-son, 2026-yil 4-sentabr) qabul qilindi.
Qarorga muvofiq, 2026-yil 1-dekabrdan Turizm qoʻmitasi huzuridagi Turizmni rivojlantirish ilmiy-tadqiqot institutiga gidlar va gid-tarjimonlarga ularning xohishiga koʻra malaka toifalarini berish vakolati yuklatiladi.
Qaror bilan «Gidlarga (gid-tarjimonlarga) malaka toifasini berish tartibi toʻgʻrisida»gi nizom ham tasdiqlandi.
Unga koʻra, gidlarga havaskor, ixtisoslashgan, professional hamda «oltin fond» gidi malaka toifalari berilishi mumkin.
Bunda malaka toifasini olish ixtiyoriy hisoblanadi. Yaʼni gidda ushbu toifalardan birining mavjud emasligi uning qonunchilikda belgilangan tartibda olingan malaka sertifikati asosida faoliyat yuritish huquqini cheklamaydi.
Toifa qanday beriladi?
Gidga malaka toifasini berishda uning kasbiy bilim va amaliy koʻnikmalari, ekskursiya xizmatlarini tashkil etish va oʻtkazish mahorati hamda ekskursiya obyektlari haqidagi bilim darajasi hisobga olinadi.
Shuningdek, turistlar bilan muloqot madaniyati, xorijiy tillarni bilish darajasi va kasb etikasi qoidalariga rioya qilishi ham baholanadi.
Talabgorlar malaka toifasini olish uchun kasbiy imtihon topshiradi.
Imtihon natijasi 56 foizdan 70 foizgacha boʻlganlarga havaskor gid, 70 foizdan 85 foizgacha natija koʻrsatganlarga ixtisoslashgan gid, 86 foizdan 100 foizgacha natija qayd etganlarga esa professional gid malaka toifasi beriladi.
Malaka sertifikati cheklanmagan muddatga rasmiylashtiriladi. Biroq gid sifatida soʻnggi ikki yil davomida faoliyat yuritmagan shaxs malaka imtihonini qayta topshirishi talab etiladi.
