Hukumatning 2026-yil 4-sentabrdagi 461-son qarori bilan «Ijtimoiy xodimlarga malaka sertifikatini berish boʻyicha davlat xizmatlarini koʻrsatish» maʼmuriy reglamenti tasdiqlandi.
Reglament ijtimoiy xodimlarga Ijtimoiy himoya milliy agentligi tizimidagi Ijtimoiy himoya tizimi xodimlarining malakasini oshirish markazi tomonidan malaka sertifikatini berish boʻyicha davlat xizmatlarini koʻrsatish tartibini belgilaydi.
Qarorga muvofiq, malaka sertifikati nazorat sinovi natijalari va talabgorning maxsus ish stajidan kelib chiqib beriladi.
Xususan, kamida 1 yillik maxsus ish stajiga ega talabgorga III toifa, 2 yillik maxsus ish stajiga ega talabgorga II toifa, 3 yillik maxsus ish stajiga ega talabgorga esa I toifa malaka sertifikati beriladi.
Bunda III toifali malaka sertifikatini olish uchun talabgordan oliy maʼlumot, II va I toifali sertifikatlar uchun esa tor doiradagi oliy maʼlumot talab qilinadi.
Malaka sertifikati 5 yil muddatga beriladi.
Nazorat sinovida ishtirok etish uchun talabgor vakolatli organ tomonidan tashkil etiladigan kamida 36 akademik soatlik oʻquv kurslarida malaka oshirishi lozim.
Malaka sertifikatini olish boʻyicha nazorat sinovi, qoida tariqasida, har chorakda bir marta oʻtkaziladi.
Talabgorlarning bilimi test va keys tahlili asosida umumiy 100 ballik tizimda baholanadi. Nazorat sinovida 70 va undan yuqori ball toʻplagan talabgor sinovdan muvaffaqiyatli oʻtgan hisoblanadi.
