Venesuela 1 mlrd dollarlik oltinini qaytarish maqsadida Angliya bankini sudga berdi

Venesuela markaziy banki koronavirusga qarshi kurashni moliyalashtirish uchun Angliya bankida saqlanayotgan 1 mlrd dollardan ko‘proq qiymatdagi oltinini qaytarish maqsadida bankka qarshi London sudiga ariza topshirdi.

Nikolas Maduro / Foto: Carlos Becerra / Bloomberg via Getty Images

Bu haqda Reuters axborot agentligi xabar berdi. Ma'lum qilinishicha, rasmiy Karakas aprelda Angliya bankiga u yerda saqlanayotgan oltinlarni qaytarish va ularni sotish maqsadida so‘rov jo‘natgan. Sud hujjatida ta'kidlanishicha, Venesuela hukumati qo‘lga kiritilgan mablag‘larni BMTdan koronavirusga qarshi kurash uchun yordam, jumladan dori-darmon, tibbiy qurilmalar va oziq-ovqat mahsulotlari olish maqsadida BMTning Taraqqiyot dasturiga o‘tkazmoqchi bo‘lgan.

Angliya bankida Venesuelaga qarashli 31 tonna oltin saqlanadi. Venesuela hukumati oltinning bir qismini qaytarishga bir necha bor uringan, biroq bankning rad javobini olib kelgan. Jumladan, bank 2018 yilda Venesuela prezidenti Nikolas Maduro davlatga tegishli oltinlarni egallab olib, o‘z shaxsiy manfaatlari uchun ishlatishi mumkinligi xavotirida 550 mln dollarlik oltinni qaytarishdan bosh tortgan.