Prezident administratsiyasi rahbariga OAV bo‘yicha yangi o‘rinbosar tayinlandi

Dilnoza Murodovna Ziyamuhamedovaga O‘zbekiston Respublikasi Prezidenti Administratsiyasi rahbarining o‘rinbosari vazifasini vaqtincha bajarish yuklatildi. U Zaynilobiddin Nizomiddinovga OAV masalalari bo‘yicha o‘rinbosarlik qiladi.

Dilnoza Ziyamuhamedova prezidenti administratsiyasi Ijro etuvchi apparati ommaviy axborot vositalari, televideniye va matbuotni rivojlantirish sho‘'basi mudiri ham hisoblanadi.

U muqaddam Axborot va ommaviy kommunikatsiyalar agentligining Ommaviy kommunikatsiyalar masalalari bo‘yicha markazi boshlig‘i lavozimida ham ishlagan.

Bundan tashqari, G‘ulomjon Xursandovich Samadov tadbirlar yoritilishini tayyorlash sho‘'basi mudiri lavozimiga tayinlangan. Bu lavozimda 2018 yildan buyon To‘lqinjon Po‘latov ishlab kelayotgandi. G‘ulomjon Samadov shu paytga qadar Xalqaro press-klub bosh prodyuseri sifatida faoliyat olib borayotgandi.

G‘ulomjon Samadov
Foto: Xalqaro press-klub

Shuningdek, Nosirjon Jamoliddinovich Jo‘rayev tahliliy materiallarni tayyorlash va Administratsiya bo‘linmalari faoliyatini muvofiqlashtirish sho‘'basi yetakchi konsultanti lavozimiga tayinlangan va shu munosabat bilan O‘zbekiston Respublikasi Prezidenti Administratsiyasi Ijro etuvchi apparati ommaviy axborot vositalari, televideniye va matbuotni rivojlantirish sho‘'basi mudiri lavozimidan ozod etilgan.

Bundan avvalroq, 2019 yil sentyabridan buyon prezident administratsiyasi rahbari o‘rinbosari sifatida ishlab kelgan Farhod Mahmudov MTRK raisiga o‘rinbosar bo‘lgani xabar qilingandi.

#Farhod Mahmudov #Dilnoza Ziyamuhamedova