Amurdagi isyon ko‘targan o‘zbekistonlik ishchilarga oblast gubernatori yordam berishni va'da qildi

Pudratchi tashkilot bilan kelishmovchiliklar sababli janjal ko‘targan Amurdagi gazni qayta ishlash zavodi quruvchilariga turli qo‘llab-quvvatlov choralari taklif etildi. Bu haqda oblast gubernatori Vasiliy Orlov ma'lum qildi.

Amurbo‘yi hukumati matbuot xizmatining ma'lum qilishicha, Orlov zavodga kelgan va ishchilar bilan uchrashgan. U shuningdek, qurilishni olib borayotgan kompaniya rahbarlari, huquqni muhofaza qilish va nazorat organlari vakillari bilan yig‘ilish o‘tkazgan.

"Ishchilarga keng miqyosli iqtisodiy qo‘llab-quvvatlov choralari taklif etildi. Bular karantinda bo‘lganlik uchun kompensatsiya to‘lovlari hamda olti oy va undan uzoq muddat vaxtada bo‘lganlarga bir martalik to‘lovlardir. "Reneyssans" kompaniyasi ana shularni taqdim etadi. Mavjud kelishmovchiliklar hal bo‘lishiga umid qilamiz", - degan u.

Qayd etilishicha, qurilish maydonidagi ishlar odatiy rejimda davom etmoqda, loyihaga 29 mingga yaqin ishchi jalb etilgan.

Avvalroq Amur oblastida «Reneyssans Xevi Indastris» kompaniyasi ishchilari uch oydan buyon maosh olmaganliklari sababli isyon ko‘targani to‘g‘risida xabar qilingandi. Kompaniya «Gazprom» pudratchisi bo‘lib, Amurdagi gazni qayta ishlash zavodi qurilishida ishtirok etmoqda.  

 O‘zbekistonning Rossiyadagi elchixonasining xabar berishicha, O‘zbekiston fuqarolari ishtirokida yuz bergan ushbu hodisa nazoratga olingan. Mazkur masala bo‘yicha Rossiya Ichki ishlar vazirligi va boshqa vakolatli organlar bilan muntazam muloqot olib borilmoqda.

 «Bo‘lib o‘tgan hodisa tafsilotlarini aniqlash hamda O‘zbekiston fuqarolarining qonuniy huquq va manfaatlari himoyasini ta'minlash maqsadida voqea joyiga elchixona bosh konsuli yetib bordi», deyiladi xabarda.