“Gazprom” 2026-yil boshidan buyon Qozogʻiston, Qirgʻiziston va Oʻzbekistonga tabiiy gaz yetkazib berish hajmini qariyb 70 foizga oshirdi. Bu haqda kompaniya boshqaruv raisi Aleksey Miller maʼlum qildi.
“Bu yil Markaziy Osiyoda ham yaxshi natijalarga erishmoqdamiz. Qozogʻiston, Qirgʻiziston va Oʻzbekistonga yetkazib berish hajmini qariyb 70 foizga oshirdik”, – dedi Miller 4-sentabr kuni Neft va gaz sanoati xodimlari kuniga bagʻishlangan yigʻilishda.
Oʻzbekiston 2023-yilda “Gazprom”dan gaz sotib ola boshladi va oʻsha yildan tabiiy gazning netto-importyoriga aylandi. Rossiya gazi Oʻzbekistonga “Oʻrta Osiyo – Markaz” magistral gaz quvuri orqali yetkazib berilmoqda. Sobiq ittifoq davrida gazni Markaziy Osiyodan Rossiya tomon tashish uchun qurilgan quvur hozir revers rejimida ishlamoqda.
“Gazprom” 2025-yilda Oʻzbekistonga 6,48 mlrd kub metr gaz yetkazib bergan, bu – 2024-yildagi koʻrsatkichdan 15 foiz koʻp.
Oʻzbekiston Milliy statistika qoʻmitasi maʼlumotlariga koʻra, 2026-yilning yanvar-iyul oylarida tabiiy yoki sunʼiy gaz importi 1 mlrd 10 mln dollarni tashkil etib, oʻtgan yilning shu davridan 8,2 foizga oshgan. Shu jumladan, suyultirilgan gaz (propan) importi 3,6 barobarga oshib, 105,4 mln dollarni tashkil etgan. Hisobot davrida tabiiy yoki sunʼiy gaz eksporti qiymat jihatdan 36,2 foizga qisqarib, 279,7 mln dollargacha pasaygan.
“Interfaks”ning yozishicha, Qirgʻiziston yiliga qariyb 500 mln kub metr gaz isteʼmol qiladi. Mamlakatda qurilishi rejalashtirilayotgan IES-2 va “Bishkekselmash” IESlari uchun “Gazprom” bilan 2040-yilgacha moʻljallangan uzoq muddatli gaz yetkazib berish shartnomalari imzolangan.
Qozogʻistonda esa Rossiya gazi Gʻarbiy Qozogʻiston, Qostanay va Aqtoʻbe viloyatlaridagi isteʼmolchilarni taʼminlash uchun yetkazib berilmoqda. Kompaniya yetkazib berish hajmi respublikadagi talabning oʻsishiga mos ravishda oshirilayotganini bildirgan. Shuningdek, Qozogʻistonning shimoliy hududlarini Rossiya gazi bilan taʼminlash masalasi ham ishlab chiqilmoqda.
