«Mirzachorbog‘» qarorgohi qayta tiklanadi – Madaniyat vazirligi

Madaniyat vazirligi mazkur xabarga munosabat bildirdi.
 
“Kun.uz saytida Karmanada joylashgan Buxoro amirining qarorgohi haqidagi maqola e'lon qilindi. Unda ushbu qadimiy yodgorlik xaroba holga kelib qolgani aytiladi. 
 
“Mirzachorbog‘” qarorgohi Karmana tumani Ko‘hnaqo‘rg‘on MFY hududida joylashgan bo‘lib, Buxoro amiri Abdulahadxon tomonidan 1900-1905 yillarda barpo etilgan. Bugungi kunda ushbu madaniy meros obekti haqiqatdan ham ta'mirtalab ahvolda. Shu boisdan "Mirzachorbog‘" qarorgohi  2020 yilda madaniy meros obektlarni ta'mirlash-tiklash dasturiga kiritilganini ma'lum qilamiz.

Ayni paytda yodgorlikka doir loyiha-smeta hujjatlari ishlab chiqilib, 2020 yil 4 noyabrdagi 01-O2-FJ/757-sonli yig‘ilish bayonining 5-bandi bilan tasdiqlangan va O‘zbekiston Respublikasi Madaniyat vazirligi huzuridagi injyenering kompaniyasiga taqdim etilgan. 

Madaniy meros obektlarni ta'mirlash-tiklash dasturiga asosan, injyenering kompaniyasi tomonidan binoning saqlangan tom qismini qayta tiklash, buzilib ketgan qismini an'anaviy usulda to‘liq tiklash, suv ketish yo‘llari va bino atrofidagi himoya yo‘laklarini ta'mirlash ishlarini boshlash uchun bir mlrd so‘m ajratilib, yaqin kunlarda tender savdolariga qo‘yilishi rejalashtirilgan. 

Kun.uz jurnalistiga madaniy meroslarimizga bo‘lgan jonkuyarlik uchun minnatdorchilik bildirib, ushbu obektni 2021-2022 yillarda to‘liq restavratsiya qilish rejalashtirilganini ma'lum qilamiz”, — deyiladi vazirlik munosabatida.