Markaziy Osiyo investitsiya jamg‘armasi tashkil etiladi

2020 yilning 18 noyabr kuni O‘zbekiston Tashqi ishlar vaziri Abdulaziz Komilov boshchiligidagi delegatsiya Vashington shahrida AQSh Xalqaro taraqqiyotni moliyalashtirish korporatsiyasi (DFC) bosh ijrochi direktori Adam Boler bilan uchrashdi.

Uchrashuvda tomonlar A. Bolerning 29 iyun – 1 iyul kunlari O‘zbekistonga tashrifi doirasida erishilgan kelishuvlarni amalga oshirish jarayonini muhokama qildilar, shuningdek sanoat, xizmat ko‘rsatish va infratuzilmani rivojlantirishga to‘g‘ridan-to‘g‘ri xorijiy investitsiyalar va yangi texnologiyalarni jalb qilishda ikki tomonlama sheriklikni yanada chuqurlashtirish istiqbollarini belgilab oldilar.

O‘zbekiston tomoni DFC ishtirokida O‘zbekistonda neft-gaz, energetika, kimyo, transport, qurilish, bank, farmatsevtika va boshqa iqtisodiyot tarmoqlarini rivojlantirish bo‘yicha loyihalarni amalga oshirishdan manfaatdor ekanligini qayd etdi. Shu nuqtayi nazardan, Amerika korporatsiyasi rahbari yirik infratuzilma loyihalarini ilgari surishga yo‘naltiriladigan Markaziy Osiyo investitsiya jamg‘armasini tashkil etishga qiziqishini tasdiqladi.

Afg‘oniston infratuzilmasini yaxshilash va mamlakatni ijtimoiy-iqtisodiy tiklash O‘zbekiston bilan DFC o‘rtasidagi hamkorlikning muhim istiqbolli yo‘nalishi hisoblanadi. Tomonlar joriy yilning may oyida boshlangan «O‘zbekiston-Afg‘oniston-AQSh» uch tomonlama hamkorlik shakli doirasida muloqotni kuchaytirish zarurligini ta'kidladilar, deyiladi TIV xabarida.