Angliya va Ispaniyada azaliy raqiblar to‘qnashuvi, Germaniyada peshqadamlik kurashi. Haftaning eng muhim 6 o‘yini prevyusi
|21:45 / 19.12.20209 33916 min
Haftaning dam olish kunlari Yevropa milliy chempionatlarida bir qator qiziqarli uchrashuvlar joy olgan. Angliya Premer-ligasi va Ispaniya La Ligasida azaliy raqiblar o‘yini guvohi bo‘lsak, Germaniya Bundesligasida peshqadamlar o‘rtasida yetakchilik uchun kurash kechadi. Quyida haftaning eng muhim 6 uchrashuvi prevyusi bilan tanishing.
Ispaniya La Ligasi. 14-tur
19 dekabr (shanba)
BARSeLONA – VALeNSIYa
O‘yin boshlanish vaqti: 20:15
TV-translatsiya: FutbolTV
Nihoyat, «Barselona» g‘alaba qozonishni boshladi, ammo aytish mumkinki, ayniqsa, «Sosedad»ga qarshi o‘yindagi g‘alaba u qadar ishonchli ko‘rinmadi. Jamoa juda ko‘p vaziyatlar yaratmoqda, shu bilan birga o‘z darvozasi oldida ham raqibga ko‘p imkoniyatlar taqdim etayapti. Shu o‘rinda vaziyatlardan unumli foydalanib, kerakli gollarni uradigan va muddatidan oldin o‘yin taqdirini hal qilib, raqibni izdan chiqara oladigan Luis Suares yetishmayapti. Antuan Grizmann esa «Atletiko»dagi sovuqqonligini yo‘qotib qo‘ygandek.
«Valensiya» turnir jadvalida 14 ochko bilan 13-o‘rinda bormoqda, lekin bundan ham badtar bo‘lishi mumkin edi. Esingizda bo‘lsa, yozda klub inqirozga tushib qolgan va barcha yetakchi futbolchilarini sotib yuborishga majbur bo‘lgandi. O‘sha paytdagi holatdan kelib chiqsak, «Valensiya»ning bugungi egallagan o‘rni kutilganidan hatto yuqoriroq ham bo‘lishi mumkin. Ayniqsa, kuchli raqiblarga qarshi o‘yinlarda «Valensiya» tarixni esdan chiqarmagan holda munosib bo‘la olyapti. «Real» ustidan yirik, «Sosedad» ustidan safardagi g‘alabalar so‘zimizga isbot bo‘la oladi. «Atletiko» bilan o‘yinda ham madridliklar yagona gol evaziga ustun kelgandilar. Shuningdek, «Valensiya»ning aynan «Barselona»ga qarshi so‘nggi o‘yinlari ham ancha muvaffaqiyatli kechganini ta'kidlash kerak. Jamoalar o‘rtasidagi oxirgi besh o‘yindan atigi bittasida «Barselona» g‘alaba qozongan, xolos. Ikki o‘yinda valensiyaliklarning qo‘li baland kelgan. Ikki yil oldin «Valensiya» «Kamp Nou»da 2:1 hisobida g‘alabaga erishgandi.
Angliya Premer-ligasi. 14-tur.
20 dekabr (shanba)
SAUTHeMPTON – MANCheSTeR SITI
O‘yin boshlanish vaqti: 20:00
TV-translatsiya: UzReportTV
Agar pozitsion va tizimli pressing nazarda tutilsa, Angliyada bu borada eng yuqori ko‘rsatkichlarga ega bo‘lgan va jamoaviy o‘yin poydevorida aynan yuqori pressing markaziy o‘rin tutadigan jamoalar – «Manchester Siti» va «Sauthempton»dir. Ulardan biri mana shu uslub tufayli kutilganidan yuqori o‘rinlarda bormoqda, ikkinchisi esa aynan ma'lum uslub asiri bo‘lib qolgani uchun muammolarga duch kelyapti. Mana shu ikki jamoa misolida biz bir narsani isbotlay olamiz – detallargacha hisoblangan jamoaviy futbol o‘rtacha jamoani bir bosh yuqori sakratib, saviyaliroq raqiblarga qarshi munosibga aylantirishi mumkin. Shu bilan birga, yulduz futbolchilarga erkinlik, rang-baranglik, individuallik va improvizatsiya ham zarur. Balkim «Manchester Siti» mana shundan aziyat chekayotgandir.
Mavzuga oid
«Sauthempton» 24 ochko bilan uchinchi o‘rinda bormoqda. «Yunayted»dan alamli mag‘lubiyatdan so‘ng, ikki g‘alaba va «Arsenal» bilan durangga erishdi. Ya'ni ochkolarni barqaror qo‘lga kiritayotgan «avliyolar» biroz bosimsiz to‘p surishlari turgan gap. «Siti»da esa vaziyat biroz og‘ir. Gvardiola shogirdlari imkon qadar peshqadamlarga yaqinlashib olishi kerak. Shu tufayli «Old Trafford»dagi o‘yinda o‘ta ehtiyotkor taktika tanlangandi. «Vest Bromvich» bilan kutilmagan durang vaziyatni badtar chigallashtirdi. Agar «Siti» bu turdayam ochko yo‘qotadigan bo‘lsa, «Liverpul»dan 7-8 ochkoga ortda qolib ketadi. Umuman oxirgi 6 uchrashuvda «Siti»da uch durang va bir mag‘lubiyat bor, mezbonlarda esa yo‘qotishlar yo‘q. «Manchester Siti» tarkibida Zinchenko shu kunlarda tarkibga qaytishi kerak. Serxio Aguero «Vest Bromvich» bilan o‘yinda 14 daqiqa harakat qildi. Katta ehtimol bilan u asosiy tarkibga qaytsa kerak. Zero, Gvardiolaning o‘zi ham bir necha bor argentinalik hujumchining yetishmayotganidan noligandi. Jamoa APL doirasidagi safar o‘yinlarida oxirgi 5 o‘yinda atigi 3 gol urdi. Gvardiola kabi murabbiy shogirdlari uchun juda kam.
Angliya Premer-ligasi. 14-tur.
20 dekabr (shanba)
EVeRTON – ARSeNAL
O‘yin boshlanish vaqti: 22:30
TV-translatsiya: FutbolTV
Gol urish, g‘alaba qozonish borasida yanada ayanchli ahvolda qolayotgan boshqa top klub bor – «Arsenal». Mavsumni Angliya Superkubogi sovrini va ikki ishonchli g‘alaba bilan boshlagan Arteta jamoasining keyingi natijalari havas qilgudek emas, hatto qo‘rqinchli darajada umidsiz – 11 o‘yinda 2 g‘alaba, 2 durang va 7 mag‘lubiyat. «Arsenal» APL da mag‘lubiyatlar soni bo‘yicha faqat uch jamoadan, urilgan gollar bo‘yicha faqat ikki jamoadan yaxshiroq bo‘lib turibdi xolos. Oxirgi 8 o‘yinda atigi 3 gol urildi va bittasi penaltidan. Faqat Yevropa Ligasida guruh bosqichining eng yaxshi jamoasi bo‘lingani muxlislarga taskin berar. Balki bermas.
Juda yomon o‘tkazilgan noyabrdan so‘ng «Everton» sekin-asta o‘ziga kelmoqda. Qatorasiga ikki yetakchi jamoa «Chelsi» va «Lester» mag‘lub etildi va bu uchrashuvlarda «Everton» birorta ham gol o‘tkazib yubormadi. «Arsenal» bilan o‘zaro o‘yinlardagi statistika londonliklarning katta ustunligini ko‘rsatsa-da, jamoalarning bugungi formasi va «Guddison Park»dagi to‘qnashuvlarning har ikkitadan bittasi mezbonlarning g‘alabasi yo durang bilan tugashini e'tiborga olsak, mehmonlarni yana bir og‘ir uchrashuv kutib turibdi. «Arsenal»ning keyingi o‘yinlari Liga Kubogida «Siti» va APLda «Chelsi» bilan derbi ekaniniyam eslatamiz, u holda Arteta rostdan ham boshi berk ko‘chaga kirib qolgandek. Odatda bunday holatlar iste'fo yoqasida turgan murabbiylar uchun ayni muddao ham bo‘ladi. Ehtiyotkorlikni yig‘ishtirib, bor imkoniyatni ishga solishga uriniladi. «Arsenal» aynan mana shu bosqichga yetib kelgani balki xavfdir. Nima bo‘lgandayam, juda yaxshi o‘yinoldi ssenariysiga ega bo‘lgan uchrashuv bizni kutib turibdi. Artetaning uzoq yillar to‘p surgan sobiq jamoasiga qarshi ekani ham alohida hikoya. Tarkiblarga kelsak, «Arsenal» maydon markazida muammolarga duch kelsa kerak. Tomas Parti jarohat olgan. Jamoa sardori Granit Jaka esa «Byornli»ga qarshi o‘yinda maydondan chetlatilgandi, unda diskvalifikatsiya bor. O‘tgan turda Gabriel ham qizil kartochka olgandi – Arteta uning yordamidan ham foydalana olmaydi. Mezbonlar safida Allan va Din hali mashg‘ulotlarga qaytmagan bo‘lishsa, Xames Rodriges bu o‘yinga tayyor bo‘lishi ham mumkin. Boshqa tarafdan Xamesning yo‘qligi «Everton»ni aynan top raqiblarga qarshi o‘yinlarda kuchliroq qila boshladi. Jamoa eski, jismoniy forma va pressinglarga urg‘u beradigan uslubga qaytdi va so‘nggi o‘yinlardagi g‘alabalar balki aynan Xamesning yo‘qligi bilan bog‘liqdir?
Angliya Premer-ligasi. 14-tur.
20 dekabr (yakshanba)
TOTTeNHEM – LeSTeR
O‘yin boshlanish vaqti: 19:15
TV-translatsiya: FutbolTV/UzReportTV
«Manchester Siti» bilan o‘yin oldidan «Tottenhem»ni qiyin taqvim kutib turganini, haqiqiy sinovlar endi boshlanayotganini taxmin qilgandik. Aytish mumkinki, Mourino bu to‘siqdan yaxshi o‘tdi – «Siti», «Arsenal», «Kristal Pelas» va «Liverpul»ga qarshi o‘yinlarda 2 g‘alaba va bir durang juda yaxshi ko‘rsatkichdir. «Liverpul»ga qarshi o‘yinda ham so‘nggi daqiqalargacha durang saqlanib turildi, hatto xavfli vaziyatlar borasida ustunlik ham bo‘ldi.
Lekin bilasizmi, aslida «Tottenhem» uchun haqiqiy sinov endi boshlanyapti. Sababi, top raqiblarning uslubi Mourinoning qarshi hujum rejasiga juda mos tushadi. «Lester», «Vulverhempton» kabi jamoalar esa aynan Jozening uslubiga yaqin to‘p surishadi, kerakli paytda yopilishni bilishadi. Va bu ishni «Tottenhem»ning mavsum boshidagi raqiblariga nisbatan sifatliroq amalga oshirishadi. Misol uchun Jozening ushbu mavsumda eng qiyin kechgan qarshiligi «Everton» bilan bo‘lganini ham eslash kifoya.
«Lester» ham xuddi «Tottenhem» kabi qarshi hujumlarda samarali harakat qiladigan va quyi blokka qarshi muammolarga duch keladigan jamoadir. Yozda ushbu jamoalar o‘rtasidagi o‘zaro o‘yinda «Lester» pozitsion o‘ynashga uringan va londonliklar tomonidan uch bor jazolangandi. Katta ehtimol bilan o‘yin tashabbuskorlik bilan emas, ko‘proq raqibning xatosini poylash bilan boshlansa kerak. Tezkor gol barchasini o‘zgartirib yuborishi mumkin.
Angliya Premer-ligasi. 14-tur.
20 dekabr (yakshanba)
MANCheSTeR YuNAYTeD – LIDS YuNAYTeD
O‘yin boshlanish vaqti: 21:30
TV-translatsiya: FutbolTV/UzReportTV
To‘qsoninchi, ayniqsa, 2000 yillar boshida bu to‘qnashuv ingliz futbolining klassikasiga aylangan derbi bo‘lgandi. «Lids Yunayted» chempionlik uchun kurashgan, Chempionlar Ligasida to‘p surgan paytlarda APLda «Yunayted»ga munosib bo‘la olgandi. Shuningdek, bu ikki jamoani Rio Ferdinand, Alan Smit hamda Erik Kantona kabi yulduzlar bog‘lab turadi. «MYu»ning chempionatda ishlari yurisha boshlagani (oxirgi 6 o‘yinda 5 g‘alaba va 1 durang), yo‘qotilgan ochkolar bo‘yicha hatto 2-o‘ringa ko‘tarilib olgani bu uchrashuv ahamiyatini oshiradi. Nihoyat, Sulsher «Old Trafford»da ham gol urishni, g‘alaba qozonishni boshlashi zarur, aks holda safar o‘yinlaridagi rekordlar (qatorasiga 10 g‘alaba) hech qanday naf keltirmasligi mumkin.
«Lids» APL ning eng qiziqarli jamoalaridan biri, Belsa shogirdlari qatnashgan o‘yinlarda jami 46 ta gol urilgan – faqat «Liverpul»da (48) kattaroq ko‘rsatkich xolos. Ayniqsa top raqiblarga qarshi o‘yinlarda «Lids» ancha tashabbuskor to‘p surgan, vaziyatlar borasida ustunlikka erishgan. Bir tomondan «Lids»ning imkoniyatlari yuqori ekanini anglatsa-da, «Yunayted»ning sevimli qarshi hujumlari uchun ham qulaydir. Statistikaga qaralsa, «Manchester Yunayted» hisobda oldinda borgan o‘yinlarda g‘alabani ushlab qola olgan, hattoki keyingi gollarni ham urib, g‘alabani mustahkamlagan. Ya'ni, raqib tashabbusni qo‘lga olganda tezkor qarshi hujumlarga tayanish «Manchester Yunayted»ning eng muvaffaqiyatli ishlaydigan uslubidir.
Raqiblarda yo‘qotishlar yo‘q, so‘nggi o‘yinlardagi tarkib saqlanib qolinsa kerak. Faqat Edinson Kavanining mashg‘ulotlarga to‘liq kirishgani va o‘yinga tayyor bo‘lishi aytildi. Kelasi haftada «Yunayted» Liga kubogi yarimfinalida «Everton» bilan o‘ynaydi. Tabiiyki, tarkib tanlashda o‘sha o‘yin ham e'tibor talab etadi. «Lids» esa ilk bosqichlardayoq «Hall Siti»dan mag‘lubiyatga uchragan.
Germaniya Bundesligasi. 13-tur
19 dekabr (shanba)
BAYYeR – BAVARIYa
O‘yin boshlanish vaqti: 22:30
TV-translatsiya: SportTV
Barcha «Dortmund» yoki «Leypsig»ning myunxenliklarga qarshilik ko‘rsatishi mumkinligi haqida taxmin qilayotganda «Bayyer» tarixni eslab qoldi va kutilmaganda, turnir jadvalida karvonboshi bo‘lib oldi. Albatta, bu yerda tasodif yo‘q, axir «Bayyer» Bundesligada 12 turdan keyin mag‘lubiyat nimaligini bilmay kelayotgan yagona jamoa bo‘lib turibdi. Shunchaki, leverkuzenliklar dastlabki 3 turda durang o‘ynab, jadvalda quyiga tushib olishgandi. Keyingi 9 turda 8 g‘alaba qo‘lga kiritildi. Barcha musobaqalarda oxirgi 4 o‘yinda yirik g‘alabalar, oxirgi uch o‘yinda jamoa 4 tadan gol urishni uddasidan chiqdi. Beyli uch yil oldingi formasiga qaytdi, Diabi, Shik, Amiri kabi futbolchilar yuqori saviyadagi futbolni namoyish etmoqdalar.
Bir tomondan, «Bayyer»ning mag‘lubiyatsiz yurishida boshqa sabab ham topish mumkin - «Bayyer» hali turnir jadvalida peshqadam bo‘lgan «Bavariya», «Dortmund», «Leypsig», hamda «Volfsburg» kabi jamoalarga qarshi maydonga tushishgani yo‘q. Demak «Bayyer»ning haqiqiy sinovi ushbu turdan boshlanadi va yangi yilgacha jamoa ambitsiyalari borasida aniq xulosa berish mumkin.
Flik shogirdlari mavsum boshidagi kabi o‘ta kuchli ko‘rinishmayapti, barqarorlikka putur yetgandek. YeChL bilan qo‘shganda, qatorasiga 10 o‘yinda g‘alaba qozongan «Bavariya» oxirgi 7 o‘yindan 4 tasida durang qayd etdi. Bularning uchtasi Bundesliga doirasidagi raqiblarga qarshi ro‘y berdi. Ma'lumki, jamoa avgustning oxirlarigacha yuqori sport formasini saqlab turishga majbur edi, keyinchalik Yevropa Superkubogi uchun ham bahs bo‘ldi. Ya'ni yozning boshidan beri yuqori jismoniy holatga kirgan jamoa uzluksiz olti oy mana shu tempda o‘yin namoyish etib kelayotgandi. Bu holat o‘ziga yarasha pasayishni ham ergashtirib kelishi tayin edi va katta ehtimol bilan myunxenliklar aynan o‘sha davrni boshdan kechirishmoqda.
Albatta, Flik o‘ziga yarasha keng tarkibga ega va rotatsiyalar orqali vaziyatdan chiqib ketishi mumkin. «Bavariya» Bundesligada ancha yomonroq vaziyatlardan ham chiqib ketganini ko‘rganmiz. Qaysidir ma'noda «Bayyer»ga qarshi uchrashuv keyingi vazifalar uchun hal qiluvchi maqomda bo‘ladi. «Bavariya» durangga rozi bo‘lsa ham, u qadar hayron qolish shart emas.
