Qo‘shilgan qiymat solig‘i summasi o‘rnini qoplash tartibiga qo‘shimchalar kiritiladi

Qayd etilishicha, Soliq kodeksiga muvofiq joriy yilning 1 iyulidan amaliyotga joriy etilgan qo‘shilgan qiymat solig‘ining salbiy farq summasi o‘rnini qoplash (qaytarish) tartibini yanada takomillashtirish talab etilmoqda.

Amalda ayrim tadbirkorlik sub'yektlari tomonidan haqiqatda qo‘shilgan qiymat solig‘i to‘lanmagan mahsulotlar bo‘yicha go‘yoki soliq to‘langanligi to‘g‘risida qalbaki bitimlar tuzilib, soliqni hisobga olish orqali salbiy farq hosil qilish va budjetdan mablag‘ undirish holatlari uchramoqda.

Loyiha soliq to‘lovchilarga qo‘shilgan qiymat solig‘i o‘rnini qoplash amaliyotida yuzaga kelgan bo‘shliqlarni bartaraf etish hamda haqiqatda budjetga kelib tushmagan qo‘shilgan qiymat solig‘i summalarini asossiz qaytarish holatlarining oldini olish maqsadida ishlab chiqilgan.

Qaror bilan Vazirlar Mahkamasining “Qo‘shilgan qiymat solig‘i hamda chet el yuridik shaxslari bilan bog‘liq soliq ma'murchiligini takomillashtirish chora-tadbirlari to‘g‘risida”gi 2020 yil 14 avgustdagi 489-son qarori 1-ilovasiga muvofiq tasdiqlangan “Qo‘shilgan qiymat solig‘i summasi o‘rnini qoplash tartibi to‘g‘risida nizom”ga o‘zgartirish va qo‘shimchalar kiritish nazarda tutilmoqda. 

Jumladan:

• qo‘shilgan qiymat solig‘i summasi o‘rnini qoplashda tovarlarni (xizmatlarni) ishlab chiqaruvchidan oxirgi iste'molchigacha bo‘lgan zanjirida soliq hisoblanishi va to‘lanishini ta'minlash, qo‘shilgan qiymat zanjirida uzilishlarga barham berish;
• soliq to‘lovchilarning kontragentlarni tanlash chog‘ida lozim darajada ehtiyotkorlik qilishi bo‘yicha mas'uliyatini oshirish, soliqlarni to‘lamaslik xavfi yuqori bo‘lgan soliq to‘lovchilar bilan xo‘jalik operatsiyalarini amalga oshirmaslikka undash yo‘li bilan soliqqa oid huquqbuzarliklarning oldini olish;
• qo‘shilgan qiymat solig‘i summasi o‘rnini qoplashda soliq organlari tomonidan soliqlarni to‘lamaslik xavfi yuqori bo‘lgan soliq to‘lovchilar bilan moliyaviy aloqalar orqali hisobga olingan qo‘shilgan qiymat solig‘i summasini bekor qilish va qoplashni rad etish holatlarini aniq belgilab qo‘yish ko‘zda tutilgan.