27 iyul kuni jinoyat ishlari bo‘yicha Shayxontohur tuman sudida Soliq qo‘mitasi raisining birinchi o‘rinbosari lavozimida ishlagan, 57 yoshli Mubin Mirzayev va yana 8 kishiga oid jinoyat ishi yuzasidan hukm o‘qildi. Bu haqda Toshkent shahar sudlari axborot xizmati xabar berdi.
Ma’lum qilinishicha, sudning hukmi bilan Mubin Mirzayev Jinoyat kodeksida nazarda tutilgan 3 ta modda bo‘yicha aybdor, deb topilgan:
- 168-moddasi 4-qismining «a» bandi (juda ko‘p miqdorda firibgarlik);
- 205-moddasi 2-qismining «a» bandi (mansab vakolatini juda ko‘p miqdorda zarar yetkazgan holda suiiste’mol qilish);
- 208-moddasida (hokimiyat harakatsizligi) nazarda tutilgan jinoyatlarni sodir etganlikda aybdor deb topildi.
Mirzayevga nisbatan 3 yil muayyan huquqdan mahrum qilgan holda 8 yil 2 oy ozodlikdan mahrum qilish jazosi tayinlandi.
Shuningdek, orasida muqaddam sudlanganlar ham bo‘lgan boshqa sudlanuvchilarga Jinoyat kodeksining quyidagi moddalari bo‘yicha aybdor, deb topilgan:
- 141-2-moddasi (shaxsga doir ma’lumotlar to‘g‘risidagi qonunchilikni buzish);
- 184-moddasi (soliqlarni yoki yig‘imlarni to‘lashdan bo‘yin tovlash);
- 189-moddasi (savdo yoki xizmat ko‘rsatish qoidalarini buzish);
- 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish);
- boshqa moddalarning tegishli qismi va bandlari bilan aybdor deb topildi.
Ular 5 yildan 9 yilgacha bo‘lgan muddatlarga ozodlikdan mahrum etildi. Sud hukmi bilan yetkazilgan zararlar undirilishi ham belgilandi.
Ma’lum qilinishicha, tayinlangan jazolar sudlanuvchilarga nisbatan «qamoqqa olish» ehtiyot chorasi qo‘llanilgan kundan boshlab hisoblanadi.
Sud yakunida raislik etuvchi taraflarga sud hukmi mazmuni va unga nisbatan shikoyat berish tartibi hamda muddatlari tushuntirgan.
Soliq qo‘mitasi raisining birinchi o‘rinbosari lavozimida ishlab kelgan Mubin Mirzayev joriy yil yanvar oyida - prezident raisligidagi videoselektorda ishdan olingan edi.
O‘shanda davlat rahbari Shayxontohur tumani soliq inspeksiyasi tomonidan Chorsu bozorida to‘lov intizomi joyiga qo‘yilmagani, Malika savdo kompleksida esa ahvol bundan ham ayanchli ekanini ko‘rsatib o‘tgandi.
Shuningdek, Soliq qo‘mitasida qo‘shilgan qiymat solig‘idan sun’iy ortiqcha to‘lov hosil qilish orqali uni byudjyetdan noqonuniy qoplash holatlari ko‘paygani qayd etilgan.
Ma’lumot uchun, Mubin Mirzayev 1969 yilda tug‘ilgan, Toshkent davlat universitetini va Toshkent Moliya institutini tamomlagan, Yaponiya siyosiy tadqiqotlar milliy instituti magistri hisoblanadi. U 2006–2008 yillarda Markaziy bankda monetar siyosat va iqtisodiy tahlil departamentini boshqargan.
Muqaddam O‘zbekiston Moliya vaziri o‘rinbosari lavozimida ishlagan Mubin Mirzayev 2017 yil avgustida Iqtisodiyot vazirining Makroiqtisodiy siyosat, bazaviy tarmoqlarni rivojlantirish va xalqaro moliya institutlari bilan ishlash masalalari bo‘yicha birinchi o‘rinbosari lavozimiga tayinlangandi.
2018 yil dekabridan buyon soliq qo‘mitasi raisi birinchi o‘rinbosari lavozimida ishlayotgandi.
