Sherzod Hidoyatov: Qurilish tenderlaridagi takliflar elektron ochiladi

Bugungi kunda O‘zbekistonda 36 ming 198ta qurilish-pudrat tashkiloti faoliyat yuritayotgan bo‘lib, shundan 12 mingtasida bir ishchi ro‘yxatga olingan. Bu haqda Qurilish vazirining birinchi o‘rinbosari Sherzod Hidoyatov AOKAda bo‘lib o‘tgan tadbirda ma'lum qildi. 

Qurilish-pudrat tashkilotlari reytingi haqida so‘z yuritildi. Hokimlarning, boshqa mansabdorlarning yaqinlari esa, qurilish tashkilotlari ochib olgan, ularning imkoniyatlari kengroq, ular shu bois bu reytingda yana yuqori o‘rinlarni olib, tenderlarni yutaveradimi? Reytingning adolatli bo‘lishi qanday ta'minlanadi?

«Reytingda 64ta ko‘rsatkich bor. Unda qurilish tashkilotining ishchi soni, amalga oshirgan ishlari, mutaxassislari, moliyaviy hisobotlari, bajargan ishlarining sifati, nazorat inspeksiyasidan olgan talablari kabilarning barchasi qamrab olingan. 

Qolaversa, reyting tizimi Soliq va Statistika qo‘mitalariga, Bandlik va mehnat vazirligiga, O‘zstandart agentligi, buyurtmachi hamda Qurilish vazirligining Nazorat inspeksiyasiga o‘zaro bog‘langan bo‘ladi. Qurilish tashkilotlari endilikda inson omili bilan baholanmaydi. 

Bundan buyog‘iga taklif ochilishi 100 foiz raqamlashdi. Tender tizimi reyting tizimiga bog‘langan. Shu bois, tenderda yutib olishi qurilish tashkilotining salohiyatiga bog‘liq bo‘ladi. 

Shunga ko‘ra, elektron tenderda kimningdir tanishi degan narsaga yo‘l qo‘yilmaydi. Masalan, Andijon viloyatidagi biror inshootni Namangan yoki Toshkentdagi pudrat tashkiloti ham yutib olishi mumkin. 

Shunday ekan, bu tashkilot ertaga qurilishini sifatli quradi, chunki uning reytingi qurgan inshooti sifatiga bog‘liq bo‘ladi», - dedi vazirning birinchi o‘rinbosari. 

U, shuningdek, tizim ishga tushirilganda qator qurilish tashkilotlaridagi ishchilar soni ham namoyon bo‘lganiga oydinlik kiritdi. 

«Bu tizimni ishga tushirgandan keyin, turli tamoyillarni sinab ko‘rayotganda, bir ko‘rsatkich orqali qurilish tashkilotlarini saralab ko‘rdik. U ham bo‘lsa ishchi kuchiga doir raqamlarni tekshirdik. 

Beshtagacha ishchisi bor qurilish tashkilotlarini saralaganimizda, bir nafar ishchisi bor qurilish tashkilotlari 12 mingdan ortiqligi ma'lum bo‘ldi. Endilikda, reyting tizimi Mehnat vazirligiga bog‘langani uchun necha nafar qonuniy ishga olingan ishchilari borligi, ular uchun soliq to‘layotgani ham ko‘rinadi, bu uning reytingiga ta'sir qiladi. Xufyona iqtisodiyotning ham oldini oladi», - deya ta'kidladi Sherzod Hidoyatov.