O‘zbekiston - Tojikiston davlat chegarasini demarkatsiya qilish bo‘yicha muzokaralar bo‘lib o‘tdi

Joriy yilning 26-30 yanvar kunlari Dushanbe shahrida O‘zbekiston va Tojikiston hukumat delegatsiyalari ishchi guruhlarining O‘zbekiston-Tojikiston davlat chegarasini demarkatsiya qilish bo‘yicha muzokaralari bo‘lib o‘tdi, deb xabar bermoqda "Dunyo".

Muzokaralar davomida tomonlarning har oydagi uchrashuvlarini o‘tkazish nazarda tutilgan 2021 yilgi tadbirlar jadvali kelishib olindi.

Uchrashuv doirasida qo‘shma dala ishlarini o‘tkazish sanalari va joylari to‘g‘risida kelishuvga erishildi, shuningdek, davlatlararo chegarani demarkatsiya qilishning boshqa masalalari ham ko‘rib chiqildi.

Muzokaralar yakuni bo‘yicha tegishli bayonnoma imzolandi.

O‘zbekiston va Tojikiston davlat chegarasining uzunligi 1,33 ming kilometrdan oshadi. Sovet ittifoqi parchalanganidan keyin o‘zbek-tojik davlat chegarasining 20 foizga yaqin qismi belgilanmasdan qolib ketgandi.