O‘zbekistonda mobil guruhlar bazasida maktabgacha ta'lim xizmatlarini ko‘rsatish kengaytiriladi

Vazirlar Mahkamasining “Mobil guruhlar bazasida maktabgacha ta'lim xizmatlarini ko‘rsatish tizimini yanada rivojlantirish chora-tadbirlari to‘g‘risida”gi qaror loyihasi e'lon qilindi.

Qayd etilishicha, maktabgacha ta'limning muqobil shakllari, jumladan zamonaviy talablarga javob beradigan avtobuslar bazasida mobil maktabgacha ta'lim guruhlarini tashkil etish bo‘yicha dastlabki loyihaning asosiy maqsadi - aholiga, asosan, bolalarni maktabgacha ta'lim bilan qamrab olish darajasi past bo‘lgan joylarda qulay maktabgacha ta'lim xizmatlarini ko‘rsatish.

Tajriba-sinov doirasida Qoraqalpog‘iston Respublikasi va viloyatlarda maktabgacha ta'lim xizmatlarini ko‘rsatish bo‘yicha mobil guruhlar bazasidagi 93ta guruhda 1 556 nafar bolaga maktabgacha ta'lim-tarbiya xizmatlari ko‘rsatilgan.

Bundan tashqari, 2020 yil oxiriga kelib respublikada bolalarni maktabgacha ta'lim bilan qamrab olish 60,9 foizni tashkil etdi. Ayni vaqtda respublika bo‘yicha maktabgacha ta'lim bilan qamrab olinmagan bolalarning umumiy soni 1 093 240 nafarni tashkil etmoqda.

“Yuqoridagilardan kelib chiqib, shuningdek, dastlabki loyihani o‘rganish natijasida Maktabgacha ta'lim vazirligi tomonidan hozirgi zamon talablariga javob beradigan avtobuslar negizida mobil guruhlar loyihasini kengaytirish bo‘yicha loyiha ishlab chiqildi.

Shuni alohida ta'kidlash lozimki, mazkur mobil guruhlar maktabgacha ta'lim xizmatlari deyarli mavjud bo‘lmagan olis hududlarda tegishli bir yo‘nalish bo‘ylab harakat qiladi.

Maktabgacha ta'lim jarayoni sifatini oshirish maqsadida bitta avtobusda xizmat ko‘rsatiladigan bolalar o‘yin maydonchalari sonini 3tadan 2tagacha qisqartirish zarur. Bu moliyaviy mablag‘lar sarfini kamaytirishga va yonilg‘i xarajatlarini qisqartirishga olib keladi”, - deyiladi hujjatda.

Ta'kidlanishicha, ushbu loyiha qabul qilinishi olis hududda yashab kelayotgan maktabgacha ta'lim yoshdagi 4 704 nafar bolalarni qo‘shimcha ravishda maktabgacha ta'lim bilan qamrab olishga imkon beradi.

Loyiha bilan maktabgacha ta'lim mobil guruhlar faoliyatini tashkil etish tartibi to‘g‘risidagi nizom tasdiqlanishi nazarda tutilmoqda.

Shuningdek, Maktabgacha ta'lim vazirligi, Qoraqalpog‘iston Respublikasi Vazirlar Kengashi, viloyat hokimliklariga qayta jihozlangan avtobuslar negizida mobil guruhlar tashkil etish, shuningdek, mobil guruhlar uchun yer uchastkalari, maydonlar ajratish va tayyorlash bo‘yicha tegishli choralar ko‘rish vazifasi topshirilmoqda.

Qarorda Ichki ishlar vazirligiga davlat raqami belgilari bepul rasmiylashtirilishi, ro‘yxatdan o‘tkazilishi, ajratilishini ta'minlash, qayta jihozlangan avtobuslarni foydalanishga topshirish bilan bog‘liq boshqa tartibni amalga oshirish topshirilgan.

Bildirilishicha, ushbu qarorning qabul qilinishi maktabgacha ta'lim tizimini takomillashtirishga, maktabgacha ta'lim tashkilotlarining moddiy-texnik bazasini kengaytirishga, zamonaviy ta'lim dasturlari, pedagogik yondashuvlar va texnologiyalarni ta'lim-tarbiya jarayoniga joriy etishga, teng ta'lim olish imkoniyatlarini taqdim etadigan maktabgacha ta'limning muqobil shakllarini rivojlantirishga xizmat qiladi.