O‘zbekiston va FAO o‘rtasida 2021-2025 yillarga mo‘ljallangan mamlakat hadli dasturi imzolandi

O‘zbekiston qishloq xo‘jaligi vaziri Jamshid Xo‘jayev FAOning Yevropa bo‘yicha mintaqaviy konferensiyasi (YeMK) raisi sifatida FAO rahbarining o‘rinbosari Vladimir Raxmanin va Markaziy Osiyo bo‘yicha mintaqaviy koordinatori, FAOning O‘zbekistondagi vakili Viorel Gutsu bilan uchrashuv o‘tkazdi. 

Uchrashuv natijasiga ko‘ra, FAO va O‘zbekiston o‘rtasida 17 million AQSh dollari miqdoridagi budjetli 2021-2025 yillarga mo‘ljallangan mamlakat hadli dasturi imzolandi, shuningdek, jami 645 ming dollarlik 4 ta grant loyihasi tasdiqlandi.

Imzolangan mamlakat hadli dasturi (MHD) oziq-ovqat tizimini isloh qilish bilan bog‘liq milliy strategik ustuvorliklarga erishishda O‘zbekiston hukumatiga ko‘mak ko‘rsatishga yo‘naltirilgan. MHDning birinchi strategik ustuvor yo‘nalishi salomatlik, farovonlik va barqaror taraqqiyotga olib keluvchi inson kapitalini inklyuziv rivojlantirishga qaratilgan. Ikkinchi strategik ustuvor yo‘nalish esa barqaror rivojlanishga hamda iqlim o‘zgarishini inobatga olgan holda rivojlanishga yo‘naltirilgan.

O‘zbekistonning qishloq xo‘jaligi sohasini rivojlantirishga qaratilgan 4 ta grant loyihalari 2021-2023 yillar mobaynida amalga oshiriladi.

"Barqaror oziq-ovqat tizimlarini geografik ko‘rsatkichlar yordamida mustahkamlash" loyihasi (2021 yil fevral - 2022 yil dekabr, budjet - 250 000 AQSh dollari) geografik ko‘rsatkichlar orqali mamlakat qishloq hududlarini rivojlantirishga imkon tug‘diradi (mahsulot nomlarini joy nomlari bilan bog‘lash nazarda tutilmoqda, Parmezan pishlog‘i, Bovar sosiskalari singari). Bu ishlab chiqaruvchi guruhlarga marketing strategiyasini belgilash hamda manfaatdor tomonlarning xabardorligi va imkoniyatlarini oshirishda yordam beradi.

"O‘zbekistonda COVID-19’ga qarshi kartoshka sohasini tiklash va rivojlantirish" loyihasi (2021 yil fevral - 2023 yil yanvar, budjet – 195 000 AQSh dollari) kartoshka ishlab chiqarish sohasini qo‘llab-quvvatlash va rivojlantirish orqali milliy oziq-ovqat xavfsizligini yaxshilashga qaratilgan.

"Sholi ekinlarini ishlab chiqarish va ishlab chiqarishni qo‘llab-quvvatlash" loyihasining (2021 yil fevral - 2022 yil sentabr, budjet – 100 000 AQSh dollari) asosiy maqsadi - oziq-ovqat xavfsizligini oshirish va mamlakatda sholichilik bilan shug‘ullanayotgan fermerlarning yashash sharoitlarini yaxshilash.

"Inklyuziv qishloq xo‘jaligi siyosatini amalga oshirishni qo‘llab-quvvatlash" loyihasidan (2021 yil fevral - 2022 yil avgust, budjet - 100000 AQSh dollari) ko‘zlangan maqsad qishloq xo‘jaligi sohasida inklyuziv siyosat yuritish natijasida qishloq joylarda yashash sharoitlarini yaxshilash, shuningdek, qishloq hududlarni rivojlantirish hamda qishloq ayollarining huquq va imkoniyatlarini kengaytirishdir.