O‘zbekistonda don xavfsizligi to‘g‘risidagi reglament tasdiqlanadi

Vazirlar Mahkamasining “Don xavfsizligi to‘g‘risida”gi umumiy texnik reglamentni tasdiqlash to‘g‘risida”gi qarori loyihasi e'lon qilindi.

Reglament loyihasi O‘zbekiston hududida muomalaga chiqariladigan, oziq-ovqat va ozuqa-yem maqsadlari uchun foydalaniladigan donga taalluqli bo‘lib, urug‘lik maqsadlari uchun mo‘ljallangan donga taalluqli emas.

Reglamentni ishlab chiqishdan maqsad - inson hayoti va sog‘ligi, jismoniy va yuridik shaxslar mol-mulki, davlat mol-mulkini himoyalash, atrof-muhit, jonivorlar va o‘simliklar hayoti yoki sog‘ligini muhofaza qilish, shuningdek don xavfsizligiga nisbatan chalg‘ituvchi harakatlar oldini olish maqsadida, don va u bilan bog‘liq jarayonlarga qo‘yiladigan, qo‘llash va bajarish uchun yagona, majburiy xavfsizlik talablarini o‘rnatishdan iborat.

Qayd etilishicha, reglamentda don ishlab chiqarishga qo‘yilgan talablarga nisbatan qo‘llaniladigan o‘g‘itlar va pestitsidlarga taalluqli bo‘lishi mumkin bo‘lgan xavflar hisobga olingan. Reglament talablariga javob bermaydigan don uchun uni utilizatsiya qilish jarayoniga qo‘yiladigan talablar o‘rnatildi.

Umumiy texnik reglament loyihasi qabul qilinishidan kutilayotgan natijalar quyidagicha:

• oziq-ovqat va ozuqa-yem maqsadlariga mo‘ljallangan donni u bilan bog‘liq ishlab chiqarish, saqlash, tashish, muomalaga chiqarish va utilizatsiya qilish jarayonlari xavflilik darajasining kamayishi;
• don yaxshi saqlanishini ta'minlash va keyinchalik undan oqilona foydalanishga ma'lum darajada ijobiy ta'sir ko‘rsatish;
• donni saqlash va qayta ishlashda uning ishonchliligi va barqarorligini ta'minlash maqsadida, xavfsizlik darajasini oshirish uchun yangi zamonaviy texnologiyalar va don xavfsizligini baholash usullari joriy etilishini tezlashtirish;
• donni qadoqlash va tamg‘alashga muayyan talablarni o‘rnatish hisobiga iste'molchilarni chalg‘ituvchi harakatlar oldini olish;
• 50dan ortiq standartlashtirish bo‘yicha me'yoriy hujjatni qo‘llashda ixtiyoriylikka o‘tkazish hisobiga, texnik jihatdan tartibga solish sohasiga oid amaldagi me'yoriy hujjatlar sonini qisqartirish.