DW xabariga koʻra, mazkur chaqiriq Litva prezidenti Gitanas Nauseda, Estoniya bosh vaziri Kristen Mixal va Latviya bosh vaziri Andris Kulbergsning 9-oktabrdagi qoʻshma maktubida bayon qilingan.
Murojaat Yevropa kengashi raisi Antoniu Koshta va Yevrokomissiya rahbari Ursula fon der Lyayenga yoʻllangan.
«Rossiya Ukraina portlarini bombardimon qilib, Ukraina donining jahon bozorlariga chiqishini toʻsmoqda. Ayni paytda oʻz donini Yevropa Ittifoqi orqali tashib, daromad olishga intilmoqda. Bizning infratuzilmamiz Rossiyaga urushni moliyalashtirishda yordam bermasligi kerak», - deyiladi maktubda.
Boltiqboʻyi davlatlari rahbarlari YEI Rossiyaga oʻz tajovuzining iqtisodiy oqibatlarini qoplash imkonini bermasligi lozimligini taʼkidlagan. Shuningdek, Ukrainaning egallab olingan hududlaridan olib chiqilgan donning Yevropa Ittifoqi orqali eksport qilinishiga yoʻl qoʻymaslik zarurligi qayd etilgan.
«Biz tajovuzkorga bosimni kuchaytirishimiz va Ukrainaga oʻz tovarlarini jahon bozoriga olib chiqishda yordam berishimiz kerak», - degan uch mamlakat rahbarlari.
Estoniya hukumati matbuot xizmati maʼlumotiga koʻra, Kristen Mixal ushbu masalani kelasi hafta boʻlib oʻtadigan Yevropa kengashi yigʻilishida koʻtarmoqchi.
Estoniya 1-oktabrdan Rossiya va Belarus donining oʻz hududi orqali tranzitini taqiqlagan. Latviya va Litva ham tariflarni oshirish va nazoratni kuchaytirish kabi choralar orqali bunday tashuvlarni cheklashga harakat qilmoqda.
Endilikda uch davlat Rossiya doni tranzitiga taqiqni butun Yevropa Ittifoqi miqyosida joriy etishni talab qilmoqda. Hozircha YEI darajasida bunday qaror qabul qilingani haqida xabar berilmagan.
