Navoiyda qurilish sohasidagi davlat xaridlariga aloqador mas'ullar ogohlantirildi

Navoiy viloyati prokurori Baxtiyor Ahmedov tomonidan viloyat DXX boshqarmasi bilan hamkorlikda viloyat hududida qurilish sohasida davlat xaridlarini amalga oshirish jarayonida korrupsion holatlarga yo‘l qo‘ymaslik borasida Navoiy viloyati prokuraturasida sohaga mas'ul tashkilotlar ishtirokida yig‘ilish o‘tkazilgan. 

Bosh prokuratura matbuot xizmatiga ko‘ra, yig‘ilishda qatnashgan Navoiy viloyat hokimining soha bo‘yicha o‘rinbosari, 5 ta buyurtmachi tashkilot rahbari va tender komissiyasi a'zolari joriy yilda amalga oshiriladigan qurilish-ta'mirlash uchun pudratchilarni tanlashda tanish-bilishchilik hamda boshqa korrupsion holatlarga yo‘l qo‘ymaslik xususida rasman ogohlantirilgan.

Yig‘ilishda loyiha va pudrat ishlari xaridi jarayonlarining shaffofligini ta'minlash, ushbu sohada «Shaffof qurilish» milliy axborot tizimidan, shu jumladan, elektron tender platformasidan tizimli foydalanish bo‘yicha zarur ko‘rsatmalar berilgan.

Shuningdek, mas'ullarga qurilish sohasida yo‘l qo‘yilayotgan korrupsiya, budjet mablag‘larining maqsadsiz sarflanishi va qurilish jarayonida shaharsozlik norma talablarining buzilish holatlariga yo‘l qo‘yib kelinayotganligi ta'kidlanib, aniqlangan har bir holatga nisbatan keskin chora ko‘rilishi va qonuniy javobgarlik muqarrarligi tushuntirib o‘tilgan.

Oldinroq, Navoiy viloyat hokimligi «Yagona buyurtmachi xizmati» injiniring kompaniyasi direktori Mansurov Bahodir Po‘latovich oilasiga tegishli bo‘lgan «Mexrangez B-2002» MChJ bir necha milliard so‘mlik davlat buyurtmalarini qo‘lga kiritgani haqida ma'lum qilingandi.