18:58 / 08.04.2021
26127
МБ раисининг биринчи ўринбосарига ҳайфсан берилди, икки вилоятдаги бошқармалар раҳбарлари ишдан олинди

Марказий банк раисининг биринчи ўринбосари Ботир Зоҳидовга ҳайфсан берилиб, камчиликларни тўғрилаш учун 2 ой муҳлат берилди. Шунингдек, Марказий банкнинг Навоий вилоят ҳамда Қашқадарё вилоят бош бошқармалари бошлиқлари лавозимидан озод қилинди.

«Тадбиркорни қўллаб-қувватламаган раҳбарнинг кабинетга киришга ҳаққи йўқ. Ўтган оғир йилни ўтказишда тадбиркорларнинг ўрни катта бўлди.

Ўтган йилда кичик бизнес субъектларига жами 120 триллион сўмлик кредит ва молиявий ёрдамлар ажратилди. Шундан, 86 триллион сўмлик кредит ажратилди, 21 триллион сўмлик кредит тўлови кечиктирилди, 12 триллион сўмлик субсидия ва солиқ имтиёзлари берилди.

Натижада, пандемиядан зарар кўрган 104 мингдан ортиқ корхоналар фаолияти тикланиб, хусусий корхоналар пул айланмаси ўтган йилга нисбатан 33 фоизга ўсди.

Электр энергиянинг улгуржи истеъмоли ўтган йил 1-чорагига нисбатан 7 фоизга (900 миллион киловаттга кўп), биржадаги савдолар 46 фоизга ошгани (15 триллион сўм) ҳам, тадбиркорлик анча фаоллашганини кўрсатади.

Шунингдек, жорий йил биринчи чорагида 27 мингта янги тадбиркорлик субъектлари ташкил этилди. Лекин яхшироқ ишлаганимизда бу кўрсаткич 50 минг бўларди», деган давлат раҳбари.

Йиғилишда Марказий банк, унинг ҳудудий бошқармалари ва тижорат банклари фаолияти ҳам талаб даражасида эмаслиги таъкидлаб ўтилди.

«Бундан ташқари, Марказий банк, унинг ҳудудий бошқармалари ва тижорат банклари фаолияти ҳам талаб даражасида эмас.

Шу сабабли, Марказий банк раисининг биринчи ўринбосари Зоҳидовга ҳайфсан берилади. Агар 2 ой ичида иш услубида ўзгариш бўлмаса, маҳаллагача тушиб ишламаса, ташаббус кўрсатмаса, уни ҳам ишдан оламан», дея давлат раҳбарининг сўзларини келтирмоқда Kun.uz мухбири.

Шунингдек, Марказий банкнинг Қашқадарё вилояти бўйича бош бошқармаси раҳбари Ражабов ҳамда Навоий вилояти бўйича бош бошқарма раҳбари Саидов ишдан олинган.

Эслатиб ўтамиз, 2017 йил августидан Марказий банк раиси ўринбосари бўлган Ботир Зоҳидов 2020 йил мартида МБ раисининг биринчи ўринбосари лавозимига тайинланганди.

Top