Notariuslar tomonidan undiriladigan to‘lovlarning maksimal miqdoriga qo‘shimcha kiritildi

Adliya vaziri tomonidan «Notariuslar tomonidan amalga oshiriladigan huquqiy va texnik tusdagi qo‘shimcha harakatlar uchun undiriladigan to‘lovlarning maksimal miqdorlariga qo‘shimcha kiritish to‘g‘risida»gi buyruq imzolandi.

Buyruq prezidentning 13.04.2018 yildagi «O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida»gi va 22.10.2020 yildagi «Favqulodda vaziyatlardan jabr ko‘rgan fuqarolarni ijtimoiy himoya qilishning qo‘shimcha choralari to‘g‘risida»gi qarorlariga muvofiq qabul qilingan.

Ushbu buyruq bilan O‘zbekiston adliya vazirining 2020 yil 29 maydagi 112-mh-son buyrug‘i bilan tasdiqlangan notariuslar tomonidan amalga oshiriladigan huquqiy va texnik tusdagi qo‘shimcha harakatlar uchun undiriladigan to‘lovlar maksimal miqdorlari izohi quyidagi mazmundagi to‘rtinchi xatboshi bilan to‘ldirildi:

prezidentning 22.10.2020 yildagi «Favqulodda vaziyatlardan jabr ko‘rgan fuqarolarni ijtimoiy himoya qilishning qo‘shimcha choralari to‘g‘risida»gi qaroriga asosan O‘zbekiston va xorijiy davlatlar hududida tabiiy va texnogen xususiyatga ega favqulodda vaziyatlar, shu jumladan maishiy tusdagi ofatlar (turar, noturar joy yong‘ini yoki qulashi, transport vositasi yong‘ini) yuz bergani oqibatida jismoniy shaxslarning aybisiz yo‘qotilgan yoki yaroqsiz holga kelgan notarial tasdiqlangan hujjatlar dublikatlari, hujjatlar ko‘chirma nusxalari hamda reyestrlardan ko‘chirmalar berishda huquqiy va texnik tusdagi qo‘shimcha harakatlar uchun haq undirilmaydi.

Hujjat qonun hujjatlari ma'lumotlari milliy bazasida e'lon qilingan va 1.04.2021 yildan kuchga kirdi.