«Afrikacha» shtamm bilan kasallanish og‘ir va o‘ta og‘ir darajada o‘tadi» – shtab a'zosi

Mutaxassis so‘zlariga ko‘ra, bugungi kunda dunyoda aniqlangan koronavirus infeksiyasining yangi shtammlari turli ko‘rinishda namoyon bo‘lishi, har qaysisi o‘ziga xos tarzda kechishi bilan o‘zaro farq qiladi.

Oxirgi tadqiqotlar natijasida “afrikacha” shtamm eng xavfli deb tan olingan, chunki bu shtamm gumoral immunitetga qarshi tura oladi va unga qarshi davolashning ta'siri pastroq. Bu shtamm bilan kasallanganlarda koronavirus infeksiyasi og‘ir va o‘ta og‘ir darajada o‘tadi.

“Ammo bu shtamm birlamchi koronavirusga va britancha shtammga nisbatan sekin tarqaluvchandir. Shu xususiyati bilan uning uchrashi kamroqdir. O‘z o‘rnida, kasallikning bu kabi shtammlaridan o‘zimizni himoyalashimiz va doimiy ravishda karantin qoidalariga rioya qilishimiz kerak, bunda doimiy niqoblarni taqish, ijtimoiy masofani saqlash va qo‘llarni antiseptiklar bilan ishlov berib turish lozim”, dedi Sevara Ubaydullayeva. 

Avvalroq, koronavirusning mazkur shtammi O‘zbekistonda ham aniqlangani haqida xabar berilgan edi.

Ma'lumot uchun, Sog‘liqni saqlash vazirligi so‘nggi bir kunda yana 300dan ortiq kishida virus aniqlangani, 2 bemor vafot etgani, shifoxonalarda koronavirus infeksiyasidan davolanayotganlar soni 2700 nafardan oshgani va ulardan 113 nafari o‘ta og‘ir ahvolda qolayotgani haqida xabar berdi.