Hindistonda Gang daryosi bo‘yida koronavirus qurbonlarining o‘nlab jasadi topildi

Hindistonning Bixar shtatida Gang daryosi bo‘yida 30 kishining jasadi topildi. Dastlabki ma'lumotlarga ko‘ra, bu jasadlar koronavirusdan vafot etgan odamlarniki bo‘lishi mumkin.

The Times of India nashrining xabar berishicha, jasadlar krematsiyalash qimmatlik qilgani sababli vafot etganlarning yaqinlari tomonidan daryoga oqizib yuborilgan bo‘lishi ehtimoli bor.

Mahalliy aholining ta'kidlashicha, ular daryoda 100dan 150gacha jasadni ko‘rishgan. Bixar ma'muriyati 30 jasad topilganini tasdiqlagan. Jasadlarning aksariyati bir necha kun avval qo‘shni Uttar-Pradesh shtatida daryoga tashlangan va oqim bilan olib kelingan bo‘lishi mumkin.

Ma'lumotlarga ko‘ra, jasadlarning ba'zilari shishib ketgan, qisman yongan va suvda bir necha kun qolib ketgan holda bo‘lgan.

Hinduiylik an'analariga ko‘ra, marhum bilan vidolashish anteshti marosimi jasadni gulxanda yoqishni talab qiladi. Hinduiylar olov marhumning ruhini osmonga ko‘tarishi va marhum u yerda qayta tug‘ilishiga ishonishadi. Marosim bundan xabardor odamlar — brahmanlar tomonidan o‘tkaziladi. Biroq koronavirusdan vafot etganlar holatida ushbu marosimni o‘tkazish ancha qimmatga tushmoqda, chunki jasadni muayyan joyda yoqish talab etiladi va brahmanlar vaziyatdan foydalanib, o‘z xizmatlari uchun ko‘proq haq so‘ramoqda. Nochor odamlar uchun hattoki gulxan yoqish uchun o‘tin sotib olish ham qimmatlik qiladi. 

Marhum krematsiya qilingandan keyin uning xoki daryoga oqizib yuboriladi. Bunda xokni hindlarda muqaddas hisoblanuvchi Gang daryosiga oqizish afzal ko‘riladi. Mahalliy matbuotning xabar berishicha, nochor oilalar marhum bilan vidolashish marosimini o‘tkazishga mablag‘lari yo‘qligi sababli Gangning muqaddas suvlari marhumni poklab, u baribir yaxshi holatda qayta tug‘ilishiga ishonib, jasadni Gangga tashlashadi.

Ta'kidlanishicha, Gang bo‘yida topilgan jasadlarni krematsiya qilish shtat ma'muriyati hisobidan amalga oshiriladi. Buksar okrug sudyasi Aman Samir jasadlarni daryoga tashlayotganlarga nisbatan qat'iy choralar ko‘rilishidan ogohlantirgan.

Hindistonda koronavirus bilan bog‘liq vaziyat aprel oyida keskin yomonlashdi. Ayni vaqtda mamlakat koronavirus bilan kasallanganlar soni bo‘yicha AQShdan keyin 2-o‘rinni egallamoqda. Rasmiy statistikaga ko‘ra, oxirgi kunlarda mamlakatda kuniga 4 mingga yaqin odam virusdan vafot etmoqda. Biroq mutaxassislarning ta'kidlashicha, kunlik o‘lim ko‘rsatkichlari bir necha marta yuqoriroq bo‘lishi mumkin.