Maktabgacha ta'lim qamrovini oshirish uchun 100 million dollar ajratilmoqda - Sherzod Asadov

Maktabgacha ta'lim qamrovini oshirish chora-tadbirlari uchun 100 million dollar ajratilmoqda. Bu haqda prezident matbuot kotibi Sherzod Asadov tomonidan o‘tkazilgan brifingda ma'lum qilindi.

“24 may kuni hurmatli prezidentimiz huzurida maktabgacha ta'lim muassasalari qamrovini kengaytirish masalalari bo‘yicha yig‘ilish o‘tkazildi.

Bilasizlar, davlatimiz rahbari bu sohaga islohotlarning birinchi kunidan katta e'tibor qaratib kelyaptilar. Bilimli yoshlarni tarbiyalash bog‘chadan boshlanadi. Buning uchun esa hamma joyda yaxshi muassasalar va sharoitlar yaratilgan bo‘lishi kerak.

2016 yilda atigi 23 foiz bolalar bog‘chaga borgan bo‘lsa, o‘tgan
4 yildagi harakatlar natijasida bugungi kunda bu qamrov 60 foizga yetdi. Lekin bu ham hali yetarli emas.

Shu bois yig‘ilishda davlatimiz rahbari tomonidan maktabgacha ta'lim qamrovini yanada oshirish bo‘yicha ko‘plab vazifalar qo‘yildi. Ulardan kelib chiqib, 26 may kuni hududlarda maktabgacha ta'lim xizmatlarini kengaytirish to‘g‘risida prezident qarori qabul qilindi.

Ushbu qarorga muvofiq, 2021-2022 yillarda maktabgacha ta'lim qamrovini oshirish chora-tadbirlarini moliyalashtirish uchun Tiklanish va taraqqiyot jamg‘armasi hisobidan 100 million AQSh dollari miqdoridagi mablag‘lar ajratilmoqda”, dedi Sherzod Asadov.

Ma'lum qilinishicha, bu mablag‘ 2022-2023 yillarda qaytarish sharti bilan, foizsiz beriladi.