«Yangi Andijon» shaharchasini barpo etish uchun 100 mln dollar ajratiladi

Prezidentning «Yangi Andijon» shaharchasini barpo etish va Andijon viloyatida tadbirkorlikni yanada qo‘llab-quvvatlash chora-tadbirlari to‘g‘risida»gi qarori qabul qilindi.

Andijon viloyatida ijtimoiy-iqtisodiy va muhandislik-kommunikatsiya tarmoqlarini hamda tadbirkorlikni rivojlantirish uchun Tiklanish va taraqqiyot jamg‘armasidan quyidagi mablag‘lar ajratiladi:

a) «Yangi Andijon» shaharchasini barpo etish uchun O‘zbekiston Respublikasi Davlat budjetiga markazlashgan investitsiyalarni oshirish hisobiga qaytarib bermaslik sharti bilan – 100 mln dollar ekvivalentida, shundan:

• 25 mln dollar ekvivalentidagi mablag‘lar – ijtimoiy soha obektlarini qurishga, shu jumladan Andijon tibbiyot instituti obektlari uchun;
• 15 mln dollar ekvivalentidagi mablag‘lar – yo‘l o‘tkazgichini va yo‘l infratuzilma obektlarini barpo etishga;
• 60 mln dollar ekvivalentidagi mablag‘lar – kommunikatsiya tarmoqlari, muhandislik infratuzilmasini yaratishga, loyihalashtirish ishlariga, qurilish ishlarini nazorat qilish, boshqarish va boshqa xarajatlarga;

b) Andijon viloyatida kichik va o‘rta tadbirkorlikni rivojlantirish uchun – 80 mln dollar ekvivalentida tijorat banklariga, shundan:

• 40 mln dollar ekvivalentidagi mablag‘lar 3 yillik imtiyozli davr bilan 7 yil muddatga 7 foiz stavkasida – teng ulushda «O‘zsanoatqurilishbank» va «Qishloq qurilish bank» aksiyadorlik tijorat banklari orqali 200 ta mahallada kooperatsiya asosida kichik biznesni va oilaviy tadbirkorlikni rivojlantirishga ko‘maklashish maqsadida biriktirilgan «yetakchi» tadbirkorlik sub'yektlarini moliyaviy qo‘llab-quvvatlashga;
• 40 mln dollar ekvivalentidagi mablag‘lar 3 yillik imtiyozli davr bilan 7 yil muddatga 11 foiz stavkasida - «Agrobank» aksiyadorlik tijorat banki orqali issiqxona massivlarini barpo etish va aholi xonadonlarida issiqxonalar tashkil etishni moliyalashtirishga;

v) kichik biznes va oilaviy tadbirkorlikni rivojlantirish maqsadlari, shu jumladan bank kreditlari bo‘yicha kafilliklar berish uchun Tadbirkorlik faoliyatini qo‘llab-quvvatlash davlat jamg‘armasi resurs bazasini oshirish hamda Xonobod shahrida ijtimoiy-iqtisodiy va muhandislik-kommunikatsiya tarmoqlarini barpo etish tadbirlarini moliyalashtirish uchun Davlat budjetiga qaytarib bermaslik sharti bilan – 20 mln dollar ekvivalentida.