Haitilik sobiq senator prezidentni o‘ldirishga aloqadorlikda gumon qilinmoqda

Haitilik sobiq senator Jon Joel Jozef mamlakat prezidenti Jovenel Moizni o‘ldirishga aloqadorlikda gumonlanib qidirilmoqda. Bu haqda Rezo Nòdwès mahalliy nashri ma'lum qildi.

Sobiq senatordan tashqari Moizning o‘ldirilishini tergov qilish doirasida yana ikki kishi – huquqshunos Jozef Feliks Badio va biznesmen Rodolf Jaar qidirilmoqda.

Politsiyada ta'kidlanishicha, ushbu shaxslarning barchasi “qurollangan va xavfli hisoblanadi”. Ular qotillik, qotillikka suiqasd va qurolli talonchilikda gumon qilinmoqda. 

8 iyulda Haiti politsiyasi boshlig‘i Leon Sharl Moizning o‘ldirilishi ishi bo‘yicha hibsga olingan 6 kishi orasida kelib chiqishi haitilik bo‘lgan Jyeyms Solaj borligini, qo‘lga olinganlardan yana biri sobiq haitilik bo‘lishi mumkinligini ma'lum qilgan.

12 iyulda AQSh davlat departamenti vakili Ned Prays AQSh Moiz o‘ldirilishi ishi bo‘yicha 3 amerikalik fuqaro ushlanganidan xabardor ekanini, ushbu fuqarolarga konsullik ko‘magi ko‘rsatilishini aytgan. O‘sha kuniyoq CNN telekanali Haiti prezidenti o‘ldirilishi bilan bog‘liq holda qo‘lga olinganlardan bir nechasi AQSh maxsus xizmatlari informatori bo‘lganini ma'lum qilgan.

Jovenel Moiz 7 iyulga o‘tar kechasi o‘z qarorgohida o‘ldirildi. Hujum vaqtida uning rafiqasi Martin Moiz yaralangan. Hozirda u AQShda davolanmoqda.