Bugun Tokio-2020 Olimpiadasining ochilish marosimi o‘tkaziladi. Olimpiyachilar paradida O‘zbekiston bu safar oldinroq chiqadi

Bugun, 23 iyul kuni Tokio-2020 Olimpiadasining ochilish marosimi bo‘lib o‘tadi. 

Tadbir Tokiodagi «Milliy» stadionda o‘tkaziladi. XXXII yozgi Olimpiya O‘yinlari ochilish marosimiga tomoshabinlar kiritilmaydi. Faqatgina 950 nafardan iborat diplomatlar, homiylar va Olimpiya qo‘mitasi a'zolari stadionda bo‘lishadi. 15 nafar davlat va xalqaro tashkilot rahbarlari ham aynan stadiondan ushbu voqeani jonli kuzatib borishlari rejalashtirilgan.

Rasmiy parad payti sportchi va delegatsiyalar a'zolari koronavirusdan himoyalanish choralarini ko‘rishadi. Barcha ishtirokchilar himoya niqoblarida bo‘lishlari va ijtimoiy masofani saqlashlari shart. 

Ijtimoiy masofa stadiongacha 2 metr, stadionning ichida 1 metrni tashkil etadi. Tana harorati 37,5 dan yuqori bo‘lganlar stadionga kiritilmaydi. Sportchilar chiqishini Olimpiada vatani Gretsiya delegatsiyasi boshlab bersa, Yaponiya mezbon sifatida yakunlaydi. 

Qayd etish joiz, O‘zbekiston yapon alifbosida tartib raqami bo‘yicha 25-o‘rindan joy olgani sababli, bu safargi marosimda avvalgilaridan oldinroq chiqadi.

Eslatib o‘tamiz, Tokio-2020 Olimpiadasida O‘zbekiston delegatsiyasi bayroqdorlari Oksana Chusovitina va Bobo Usmon Baturov bo‘lishadi.

Ma'lumot uchun, Toshkent vaqti bilan soat 16:00da boshlanadigan ochilish marosimi axborot hamkorimiz «Sport TV» orqali jonli efirda namoyish etiladi.