Kilian Mbappe
Qayerdan: «PSJ»
Nomzod: «Real»
Kilian Mbappening «PSJ»dan «Real»ga o‘tishi bo‘yicha saga joriy transferlar oynasi uchungina emas, tarixdagi eng intrigalisi bo‘lishi ham mumkin. Hujumchi anchadan buyon Madrid klubiga o‘tishni istaydi, u bolaligidan ushbu klub va Krishtianu Ronaldu fanati bo‘lgan.
Insayder Fabritsio Romanoning yozishicha, madridliklar Mbappe uchun 160 mln yevrolik taklif jo‘natgan, ammo parijliklar bu taklifni rad etishgan. Marca jurnalisti Xose Feliks Diasning ma'lumotiga ko‘ra, 22 yoshli fransuz allaqachon «Real» bilan o‘zaro shartnoma bo‘yicha kelishib qo‘ygan, ammo u hozirgi klubi bilan ham munosabatlarni yomonlashtirmoqchi emas. «Real» navbatdagi taklifni tayyorlamoqda, futbolchi esa rahbariyat bilan uchrashmoqchi.
Endi barchasi «PSJ» prezidenti Nosir Al-Xilayfiyning qaroriga bog‘liq bo‘lib turibdi. Qatarlik biznesmen Mbappeni jamoada olib qolishni istamoqda. Holbuki forvardning shartnomasi 2022 yil yozida tugaydi va u keyingi yozda klubni erkin agent sifatida tark etishi mumkin, Mbappening o‘zi esa Parijda qolmoqchi emas, u hozirgacha shartnomani uzaytirish bo‘yicha kamida uchta taklifni rad etgan. Le Parisien xabariga ko‘ra esa, «PSJ» madridliklarning 160 mln yevrolik taklifini rad etmagan va taklif ko‘rib chiqish jarayonida.
Harri Keyn
Qayerdan: «Tottenhem»
Nomzod: «Manchester Siti»
«Tottenhem» sardori Harri Keyn bu yozda 28 yoshga to‘ladi, lekin u shu vaqtgacha birorta sovrin yutmagan. Ushbu hujumchini top-klublar o‘z safida ko‘rishni istashadi, ammo uni qo‘yib yuborishmayapti. «Tottenhem» prezidenti Deniel Levi «Manchester Siti»ning barcha takliflarini rad etgan, holbuki «shaharliklar» APLning o‘tgan mavsumdagi eng yaxshi to‘purari va eng yaxshi assistenti uchun 150 million yevro to‘lashga tayyor.
«Siti» bosh murabbiyi Pep Gvardiola Angliya chempionlari Jyek Grilishni katta pulga sotib olganidan keyin Leo Messi uchun da'vogarlik qila olmasligini aytgandi. Keyn haqida esa ispaniyalik mutaxassis shunday degan: «Men bu savolga avvalgi matbuot anjumanida javob berib bo‘lganman. U «Tottenhem» futbolchisi va men u haqida gapirmoqchi emasman. O‘tgan safar men istisno qilgandim, ammo bu mening ishim emas».
Yevro-2020dan keyin Keyn «Tottenhem» mashg‘ulotlarini boykot qilib ko‘rdi, ammo baribir jamoa bazasiga qaytishga majbur bo‘ldi. U birinchi turda «Manchester Siti»ga qarshi o‘yinni (1:0) o‘tkazib yubordi, bu esa matbuotda keng muhokamalarga sabab bo‘ldi, ammo «Vulverhempton»ga qarshi o‘yinda forvard zaxiradan maydonga chiqib, 20 daqiqa o‘ynadi.
