Xatirchidagi maktab negizida aniq fanlarga ixtisoslashtirilgan maktab-internat tashkil etiladi

Xatirchi tumanidagi Tama bahrin mahallasidagi 22-maktab negizida aniq fanlarga ixtisoslashtirilgan maktab-internat tashkil etiladi. Bu haqda prezidentlikka nomzod Shavkat Mirziyoyev Navoiy viloyati saylovchilari bilan uchrashuvida aytib o‘tdi.

Foto: 22-maktabningFacebook sahifasi

“Ma'lumki, Navoiy viloyati katta ilmiy, texnik va intellektual salohiyatga ega.

Sizlar yaxshi bilasiz, Xatirchi tumanida mashhur Tama bahrin mahallasi bor. Mahallada joylashgan 22-maktab viloyatning eng ilg‘or ta'lim maskanlaridan biri hisoblanadi. Bu yil Navoiy viloyati maktab bitiruvchilari oliygohlarga kirish bo‘yicha mamlakatimizda birinchi o‘rinni egallashida ushbu jamoaning alohida hissasi bor.

Bu yerda faoliyat yuritayotgan fidoyi ustozlar mehnatini munosib rag‘batlantirish maqsadida, ushbu maktab negizida aniq fanlarga ixtisoslashtirilgan maktab-internat tashkil etsak, o‘ylaymanki, barchangiz bu fikrni qo‘llab-quvvatlaysiz”, dedi prezidentlikka nomzod.